Aqmola oblysynda stalkıng deregine qatysty alǵashqy qylmystyq is qozǵaldy
KÓKShETAÝ. KAZINFORM – Aqmola oblysynda Qylmystyq kodekstiń stalkıngke qatysty jańadan engizilgen 115-1-baby boıynsha alǵashqy qylmystyq is tirkeldi. Burynǵy tanysynyń uzaq ýaqyt boıy qýdalaýyna shydamaǵan áıel polıtsııaǵa júgingen.
Polıtsııa departamentiniń málimetinshe, Bulandy aýdanynda stalkıng faktisi alǵash ret resmı túrde tirkelgen.
Qazan aıynda Makınsk qalasynyń 44 jastaǵy turǵyny polıtsııaǵa aryz túsirip, birneshe aı boıy burynǵy tanysy ózin mazalap júrgenin aıtqan. Áıeldiń sózinshe, 38 jastaǵy er adam túrli nómirlerden telefon shalyp, jumys ornyna, úıine kelip, qoǵamdyq oryndarda ańdyp júrgen. Mundaı áreketter onyń tynyshtyǵyna ǵana emes, ómirine qaýip tóndiretindeı deńgeıge jetken.
Vedomstvo málimetinshe, qyrkúıek aıynda ýchaskelik ınspektorlar er adamǵa qorǵaý nusqamasyn bergen, al sot oǵan jábirlenýshige jaqyndaýǵa tyıym salǵan. Alaıda ol tyıymǵa baǵynbaı, qýdalaýdy jalǵastyrǵan. Osydan keıin áıel er adamdy qylmystyq jaýapkershilikke tartýdy surap, polıtsııaǵa qaıta júgingen.
Polıtsııa departamentiniń tergeýshisi Bekzat Bolpanov Qylmystyq kodekstiń 115-1-baby (Stalkıng) boıynsha sotqa deıingi tergeýdi bastaǵan. Tergeý barysynda jábirlenýshi men kúdiktiden jaýap alynyp, janjal jaǵdaılaryn kórgen kýágerler anyqtalǵan. Er adam óziniń áreketin «qatynasty qalpyna keltirý talpynysy» dep túsindirgenimen, quqyqqa qaıshy áreket jasaǵanyn moıyndaǵan.
Keıinnen jábirlenýshi qarsy aryz jazyp, isti toqtatýdy suraǵan. Prokýrordyń kelisimimen tergeý aıaqtalǵan.
Polıtsııa ókilderi stalkıngtiń «sezimniń kórinisi» emes, adamnyń psıhologııalyq saýlyǵyna nuqsan keltiretin jáne qaýip tóndiretin zańsyz áreket ekenin atap ótti. Quqyq qorǵaý organdary azamattardy kez kelgen qýdalaý, ańdý nemese májbúrli baılanys áreketteri baıqalsa, dereý polıtsııaǵa júginýge shaqyrdy.
Eske salaıyq, stalkıng úshin jaýapkershilik qarastyrylǵan bap Qazaqstannyń Qylmystyq kodeksine bıyl shilde aıynda engizilgen. Buǵan deıin elde atalǵan bap boıynsha eki qylmystyq is qozǵalǵany habarlanǵan.