Aqmola oblysynda segiz jyl burynǵy kisi óltirý qylmysy ashyldy

ASTANA. KAZINFORM - Aqmola oblysynyń krımınaldyq polıtsııa qyzmetkerleri segiz jyl buryn jasalǵan kisi óltirý qylmysyn ashty, - dep habarlaıdy Polisia.kz.

Jedel-izdestirý is-sharalarynyń nátıjesinde kúdikti anyqtalyp, onyń kinási molekýlıarlyq-genetıkalyq saraptama arqyly dáleldendi.

Qylmystyq is materıaldaryna súıensek, 2017 jyldyń qazan aıynda Arshaly kentindegi turǵyn úılerdiń birinen 78 jastaǵy er adamnyń kóptegen pyshaq jaraqattary bar denesi tabylǵan. Tergeý barysynda kúdikti retinde sol kezde nebári 16 jasta bolǵan jergilikti turǵyn anyqtalǵanymen, ony qylmysqa tikeleı baılanystyratyn aıǵaqtar jetkiliksiz boldy. Osylaısha is ashylmaı, tergeý tyǵyryqqa tirelgen edi. Alaıda ótken jyldyń jeltoqsan aıynda kúdikti Qostanaı oblysyndaǵy shekara baqylaý-ótkizý pýnktinde elden shyǵýǵa áreket jasaǵan kezde ustaldy.

Sot sanktsııasynyń negizinde odan qan úlgileri alynyp, júrgizilgen molekýlıarlyq-genetıkalyq saraptama pyshaq sabynan alynǵan bıologııalyq materıaldyń oǵan tıesili ekenin anyqtady. 21 aqpanda Aqmola oblysy prokýratýrasynyń úılestirýimen krımınaldyq polıtsııa basqarmasynyń qyzmetkerleri 23 jastaǵy kúdiktini Temirtaý qalasynda qolǵa túsirip, ony Arshaly aýdanynyń ýaqytsha ustaý ızolıatoryna qamady.

Qazirgi ýaqytta atalǵan kisi óltirý faktisi boıynsha sotqa deıingi tergeý jalǵasýda. Tıisti saraptamalar taǵaıyndalyp, qajetti tergeý is-sharalary júrgizilip jatyr.

Osyǵan deıin esirtki kontrabandasymen aınalysty degen kúdikti Reseıden ekstradıtsııalanǵany týraly jazdyq.