Aqmola oblysynda sibir elikterin atqandarǵa qatysty eki qylmystyq is qozǵaldy
KÓKShETAÝ. KAZINFORM - Aqmola oblysynyń Aqkól jáne Shortandy aýdandarynda eki sibir eligin atyp alǵan brakonerlerdiń ústinen qylmystyq is qozǵalyp, sotqa deıingi tergeý amaldary júrgizilip jatyr.
Aqmola oblysy PD baspasóz qyzmetiniń málimetinshe, 2024 jylǵy 1-29 aqpan aralyǵynda oblys aýmaǵynda brakonerlikti, bıologııalyq resýrstar nysandarynyń zańsyz aınalymyn anyqtaý jáne jolyn kesý baǵytynda «Brakoner» jedel-aldyn alý sharasy qolǵa alyndy.
«Tabıǵatty qorǵaý polıtsııasy bólimsheleriniń qyzmetkerleri jyl basynan beri ań aýlaý erejelerin buzǵan 75 adamdy ákimshilik jaýapqa tartyp, balyq aýlaý erejelerin buzǵan 18 adamǵa ákimshilik hattama toltyrdy. Sonymen qatar QR Qylmystyq kodeksiniń 337-baby boıynsha Aqkól jáne Shortandy aýdandarynda eki sibir eligin atý deregine baılanysty sotqa deıingi 2 qylmystyq isti tergeýde», - dedi vedomstvodan.
PD baspasóz qyzmetinen atap ótkendeı, zańsyz ań aýlaǵany úshin sanatyna qaraı qylmystyq zańnamada 3 myń AEK mólsherinde aıyppul salý, ıá bolmasa 3 jylǵa deıin bas bostandyǵyn shekteý nemese bas bostandyǵynan aıyrý túrindegi jaza kózdelgen. Eger qylmys erekshe qorǵalatyn aýmaqta ne quryp ketý qaýpi tóngen sırek janýarlarǵa qatysty jasalsa, onda kináli adam 6 myń AEK deıin aıyppul arqalaıdy nemese 3 jyldan 6 jylǵa deıin bas bostandyǵynan aıyrý jazasyna kesiledi.
2023 jyly Aqmola oblysynda qaban, elik jáne aqbóken tárizdi jabaıy janýarlardy zańsyz aýlaý derekteri boıynsha sotqa deıingi qozǵalǵan 13 tergeý sharalary aıaqtaldy.
Eske salaıyq, budan buryn Kókshetaý turǵyny sharbaqqa qysylyp qalǵan elikti qutqarǵanyn jazǵan edik.
