Aqmola oblysynda Ortalyq Azııadaǵy eń úlken saýyn karýseli iske qosyldy
ASTANA. KAZINFORM - Aqmola oblysynyń «Rodına AF» JShS kásipornynda Qazaqstan men Ortalyq Azııadaǵy qýattylyǵy jaǵynan eń úlken saýyn karýseli iske qosyldy. Іs-sharaǵa aýyl sharýashylyǵy vıtse-mınıstri Amanǵalıı Berdalın jáne oblys ákiminiń orynbasary Murat Balpan qatysty.
Bul jańashyl jobanyń qýattylyǵy kúnine 2 000 sıyrdy saýyp, bir ýaqytta 80 basty qamtýǵa múmkindik beredi. Karýselde qoldanylatyn shvedtik DeLaval brendimen jabdyqtalǵan robottandyrylǵan júıe adamı faktordy azaıtyp, saýý protsesin avtomattandyrylǵan túrde júrgizedi. Bul tehnologııa sıyrlardyń densaýlyǵyn baqylap, sút sapasyn turaqty túrde baqylaýǵa múmkindik beredi.
- Bizdiń jańashyl jobamyzdyń basty ereksheligi - bul tek aınalyp turatyn karýsel emes, ol jan-jaqty taldaý júrgize alatyn, árbir sıyrdy baqylap, onyń densaýlyǵy men sút sapasyn anyqtaıtyn júıe. Biz bul jobany jańartý qajettiliginen júzege asyrdyq. Alǵashqy saýyn karýseldi 17 jyl buryn ornatqan bolatynbyz. Sol ýaqyttan beri tehnologııalar aıtarlyqtaı ózgerdi, - dedi «Rodına AF» JShS basshysy Ivan Adamovıch Saýer.
Jańa saýyn karýseli júıesiniń iske qosylýy sút óndirisiniń kólemin arttyrýǵa múmkindik beredi. Bul jobaǵa 2 mıllıard 909 mıllıon teńge kóleminde ınvestıtsııa tartylyp, 38 jańa jumys orny ashyldy. Jańa jumys oryndarynyń ortasha aılyq jalaqysy 450 000 teńgeni quraıdy. Joba aıasynda sút óndirisi jylyna 40 myń tonnaǵa deıin ulǵaıady, bul eńbek ónimdiliginiń 1,5 esege artatynyn bildiredi.
Jańa sút-taýarly fermanyń tehnologııalyq jabdyqtary sıyrlardyń tuıaqtaryn avtomatty túrde óńdeıtin vannalar, densaýlyq jaǵdaıyn baqylaıtyn kameralar, sút sapasyn anyqtaıtyn datchıkter men sútti saqtaıtyn arnaıy rezervýarlarmen jabdyqtalǵan. Budan basqa, sútti salqyndatý jáne sý, jylýdy qaıta qalpyna keltirý júıeleri ornatylǵan. Bul barlyǵy sút óndirisiniń tıimdiligin arttyrýǵa, jumysshylardyń eńbek jaǵdaılaryn jaqsartýǵa jáne ekologııalyq taza ónim alýǵa múmkindik beredi.
Aıta ketý kerek, keshenniń iske qosylýy – Memleket basshysynyń óńdelgen aýyl sharýashylyǵy ónimderiniń úlesin 70%-ǵa deıin arttyrý jónindegi tapsyrmasyn júzege asyrýdaǵy mańyzdy qadam.
- Bizdiń aldymyzda sút ónimderin elordaǵa jetkizýdi 50%-ǵa deıin arttyrý mindeti tur. Bul úshin óńirde jańa óndirister qurylyp, qoldanystaǵylary keńeıtilýde. Investıtsııalyq jobalardy jeńildetilgen nesıeleý baǵdarlamasy tıimdi qoldaý quralyna aınaldy, dep atap ótti Murat Balpan.
Bul joba óńirdegi aýyl sharýashylyǵy óndirisin jańa deńgeıge kóterip, jumys oryndaryn qurý, sút ónimderin kóbeıtý arqyly ekonomıkanyń damýyna óz úlesin qosatyn mańyzdy bastama bolyp tabylady.