Aqmola oblysynda mal urlyǵyn kásip etken qos azamat sottaldy

ASTANA. KAZINFORM – Astrahan aýdany prokýratýrasynyń úılestirýimen óńirde uzaq ýaqyt mal urlaýmen aınalysqan eki azamat ustaldy. Bul týraly Aqmola oblysynyń prokýratýrasy málimdedi. 

Bul adamdar birneshe aı boıy ádeıilep oblys aýmaǵynda aıaldap, kúndiz jaıylymda júrgen maldy baqylap, túnde qoldy qylyp júrgeni anyqtaldy. Urlyq jasaǵan qos azamattyń zańsyz áreketteri saldarynan Tselınograd, Astrahan jáne Atbasar aýdandarynyń 8 turǵyny zardap shekken. 

Aýdandyq sot atalǵan tulǵalardy mal urlyǵy boıynsha (QR QK 188-1-babynyń 3-bóligi) kináli dep tanyp, 5 jylǵa bas bostandyǵynan aıyrdy.

Sondaı-aq eki azamattyń bireýine tıesili qylmys quraly bolyp tanylǵan «ÝAZ» markaly avtokóligi tárkilendi.

Mal urlyǵy aýyldyq mekender úshin búgingi kúni ózekti máselelerdiń biri. Atalǵan qylmys túrimen kúres júrgizý úshin oblystyń barlyq quqyq qorǵaý organdary jumylyp otyr.