Aqmola oblysynda energetıkterge qatysty tergeý bastaldy

KÓKShETAÝ. KAZINFORM — Básekelestikti qorǵaý jáne damytý agenttiginiń Aqmola oblysy boıynsha departamentiniń málimetinshe, «Kókshe Energo» JShS-nyń is-áreketterinde elektr energııasyn esepteý quraldaryn aýystyrǵan kezde plombalaý jáne plombany alý qyzmetteri úshin aqy alý barysynda zańbuzýshylyq belgileri anyqtalǵan. Sebebi tutynýshylardyń esh kinási bolmaǵan. Bul týraly Kazinform agenttiginiń tilshisi habarlaıdy.

Básekelestikti qorǵaý jáne damytý agenttiginiń Aqmola oblysy boıynsha departamenti «Kókshe Energo» JShS-ǵa qatysty básekelestikti qorǵaý salasyndaǵy zańnamany buzý belgileri boıynsha tergeý júrgizip jatyr. Bul týraly antımonopolııalyq vedomstvo óziniń resmı paraqshasynda málimdedi.

— Tergeý júrgizýge kásiporynnyń kompanııa áreketterinde buzýshylyq belgileri bar ekendigi týraly buryn Departament shyǵarǵan habarlamany oryndamaýy negiz boldy. Tergeý máni – QR Kásipkerlik kodeksiniń 174-babynda jáne 174-babynyń 4) tarmaqshasynda kózdelgen ústeme ne monopolııalyq erejeni teris paıdalaný faktileriniń jasalýyn rastaıtyn nemese joqqa shyǵaratyn naqty derekterdi anyqtaý – naryq sýbektisine nemese tutynýshyǵa óz mazmuny boıynsha nemese iskerlik aınalym dástúrine sáıkes osy kelisimderdiń nysanasyna qatysy joq qosymsha mindettemeler qabyldatý arqyly kelisim jasasýǵa shart qoıý ne ony kúshtep tańý, — dep túsindirdi vedomstvoda.

Antımonopolııalyq departament «Kókshe Energo» JShS-nyń is-áreketterinen elektr energııasyn esepteý quraldaryn aýystyrǵan kezde oǵan tutynýshylar kináli bolmasa da plombalaý jáne plombany alý qyzmetteri úshin tutynýshylardan aqy alý barysynda zańbuzýshylyq belgilerin anyqtaǵan.

Buǵan deıin elimiz 2027 jylǵa qaraı elektr energııasyna degen qajettilikti tolyq qamtamasyz etetini habarlanǵan.