Aqmola oblysynda egis naýqany ǵylymı usynymdarǵa negizdelip júrgizilip jatyr
ASTANA. KAZINFORM - 2025 jylǵy kóktemgi egis naýqany aıasynda Aqmola oblysynda ǵylymı negizdelgen tásilder men zamanaýı agrotehnologııalar keńinen engizilýde. Bul sharalar aýyl sharýashylyǵy ónimderiniń ónimdiligi men turaqtylyǵyn arttyrýǵa múmkindik berip otyr.
Bıylǵy jyly óńirde 336 myń tonna mıneraldy tyńaıtqysh engizý josparlanyp otyr, bul shamamen 3 mln gektar egis alqabyn qamtıdy. Bul kórsetkish ótken jylmen salystyrǵanda 23 paıyzǵa joǵary. Mundaı ósimge tyńaıtqysh qunynyń 60 paıyzyn memleket óteıtin jańa sýbsıdııalaý mehanızmi óz yqpalyn tıgizdi.
«Tyńaıtqyshtardy durys qoldaný, sapaly tuqym jáne agrarlyq ǵylym usynymdaryn saqtaý — salanyń turaqty damýynyń negizi. Qazirgi tańda tek qana egý emes, ǵylymı negizdelgen tásilmen, aqylmen egý mańyzdy», — dedi Aqmola oblysynyń ákimi Marat Ahmetjanov.
Búgingi tańda oblysta 34 attestattalǵan tuqym sharýashylyǵy sýbektisi jumys isteıdi. Olar ótken jyly 99 myń tonnaǵa jýyq joǵary sapaly tuqym óndirgen. Qazirgi tańda 540,2 myń tonna dándi jáne dándi-burshaqty, 12,1 myń tonna maıly, 3,8 myń tonna mal azyqtyq jáne 7,3 myń tonna kartop tuqymy sebýge daıyn. Osylaısha oblys tuqymmen tolyq qamtamasyz etilgen.
Bıylǵy jyly tuqym jańartý deńgeıin 11,2 paıyzǵa jetkizý kózdelip otyr. Sonymen qatar, ǵylymı mekemeler usynǵan sorttyq quramdy saqtaý basty nazarda: jazdyq bıdaıdyń 30 paıyzy erte pisetin, 50 paıyzy ortasha, 20 paıyzy kesh pisetin sorttarmen egiledi.
Egiske daıyndyqtyń mańyzdy kezeńderiniń biri - tuqymdy zalalsyzdandyrý. Oblysta bul maqsatta qajetti dári-dármekterdi satyp alýǵa barlyq jaǵdaı jasalǵan. Іshki naryqta tuqymdyq materıaldy óńdeýge arnalǵan túrli hımııalyq zattardy usynatyn otandyq óndirýshilerdiń qatary artýda.
Oblysta qoldanylyp jatqan agrotehnologııalardyń barlyǵy jetekshi agrarlyq ınstıtýttar men sarapshylardyń ǵylymı usynymdaryna negizdelgen. Bul — aýyl sharýashylyǵyn táýekeli joǵary aımaqta tıimdi júrgizýge jáne resýrstardy ońtaıly paıdalanýǵa jol ashady.
Osyǵan deıin Aqmola oblysynda birneshe aýyl taratylatyny týraly jazdyq.