Aqmola oblysy lızıng esebinen 50 jedel járdem kóligin satyp alady

KÓKShETAÝ. KAZINFORM – Bıylǵy jyldyń naýryz aıynda Aqmola oblysyna jańa jedel járdem kólikteriniń alǵashqy partııasy jetkiziledi. Jalpy, oblysta lızıng esebinen osyndaı 50 avtokólik satyp alý josparlanǵan. Bul týraly aımaq basshysy Marat Ahmetjanov málim etti.

Aqmola oblysyndaǵy jedel járdem stantsııalarynda arnaıy kólikterdiń tapshylyǵy týraly osyǵan deıin birneshe ret aıtylyp keldi. Ásirese, bul Qosshy qalasynda anyq sezilip tur. Reglament boıynsha árbir 10 myń adamǵa joq degende bir jedel járdem brıgadasy qyzmet kórsetýi tıis. Sol sebepti, kún sanap adam sany artyp kele jatqan Qosshyǵa jedel járdem kólikteri aýadaı qajet.

«Men lızıng esebinen barlyq komponentteri bar 50 zamanaýı jedel járdem avtokóligin satyp alý týraly tapsyrma berdim. Ótken jyly, ókinishke qaraı, konkýrs ótkizilmedi, óıtkeni jasalǵan konkýrstyq qujattama áleýetti qatysýshylardy tartpaǵan sııaqty. Bıyl qujattamany ázirleýde biz sonyń bárin eskerdik», - dep atap ótti Marat Ahmetjanov.

Aıta ketsek, budan buryn Aqmola oblystyq balalar aýrýhanasynda eki táýlikte 3 bala kóz jumǵanyn jazǵan edik.