Aqmola oblysy qalaı damıdy - Marat Ahmetjanov BAQ ókilderiniń suraqtaryna jaýap berdi
KÓKShETAÝ. KAZINFORM - Ákimdikte óńir basshysy Marat Ahmetjanovtyń qatysýymen Aqmola oblysynyń 2023 jylǵa arnalǵan áleýmettik-ekonomıkalyq damýynyń qorytyndylary boıynsha brıfıngi ótti.
Sharaǵa oblystyq áleýmettik sala, turǵyn úı-kommýnaldyq sharýashylyq, týrızm jáne ekonomıka basqarmalarynyń basshylary da qatysty.
Marat Ahmetjanov BAQ ókilderin Ulttyq basylym kúnimen quttyqtap, memlekettik organdardyń qoǵam men BAQ úshin qoljetimdiligi men ashyqtyǵynyń mańyzdylyǵyn atap ótti.
«Ótken jyldyń sońynda sizdermen kezdesýde men atqarylyp jatqan jumystar men aldaǵy josparlar týraly únemi habardar bolatynyma sendirdim. Búgin, 2023 jyldyń qorytyndysyn shyǵara otyryp, oblystyń negizgi áleýmettik-ekonomıkalyq kórsetkishteri boıynsha oń dınamıka baıqalatynyn atap ótýge bolady», - dep atap ótti oblys ákimi.
Spıker óńirdi odan ári damytý úshin aýyl sharýashylyǵy, kásipkerlik, ınvestıtsııalar tartý, týrızmdi damytý, ınfraqurylymdy jaqsartý jáne elordalyq eldi mekenderdi damytýdyń negizgi baǵyttaryn atap ótti.
«El prezıdenti berik ónerkásiptik qańqany qurý úshin óńdeý sektoryn shoǵyrlandyrylǵan damytýdyń mańyzdylyǵyn atap kórsetedi. Bul turǵyda óńdeý ónerkásibinde eki ese ósýge qol jetkizý maqsatynda óndiris kóleminiń 17% ósýin qamtamasyz etý qajet, bul jyl saıyn 250 mlrd. teńgeni quraıdy. Ol úshin ónerkásiptik kásiporyndardyń júktemesine taldaý júrgizip, olardy ulǵaıtý sharalaryn ázirleý qajet. Sondaı-aq, aǵymdaǵy jyly maıly daqyldardyń egis alqaptaryn eki esege ulǵaıtý jáne aýyl sharýashylyǵy janýarlary sanynyń odan ári ósýine múmkindik beretin berik jem-shóp bazasyn qurý qajet», - dedi M.Ahmetjanov.
Oblys ákimi basty mindetterdiń biri úsh jyl ishinde óńdelgen aýyl sharýashylyǵy ónimderiniń 70% úlesine qol jetkizý ekenin atap ótti. Aǵymdaǵy jyly óńir aýmaǵynda jobalardy iske asyrýǵa múddeli ınvestorlardy tartýdy ulǵaıtý talap etiledi.
«Óńirdiń erekshelikterin eskeretin aldaǵy 5 jylǵa arnalǵan týrızmdi damytý strategııasyn ázirleý, sondaı-aq olardyń jumys tıimdiligin baǵalaý úshin aýdandar men qalalar ákimderiniń reıtıngin engizý mańyzdy mindet bolyp qala beredi. Jalpy, alǵa qoıylǵan mindetterge tabysty qol jetkizý úshin jańa tásilderdi qoldaný jáne resýrstardy barynsha jumyldyrý talap etiledi», - dep tolyqtyrdy óńir basshysy.
Kezdesý BAQ ókilderiniń suraqtaryna jaýaptarmen jalǵasty.
Eń kóp talqylanǵandardyń biri ekologııa taqyryby boldy. Aımaqtyń ekologııalyq problemalarynyń tiziminde – qaladaǵy atmosferalyq aýanyń, sýdyń jáne topyraqtyń lastanýy. Jýrnalıster óńir basshysynyń nazaryn Makınsk jáne Şýchınsk qalalaryndaǵy ekologııalyq atmosferaǵa shyǵaryndylarǵa, Arshaly aýdanyndaǵy ruqsat etilmegen qoqystarǵa jáne t. b. aýdardy.
BAQ ókilderin densaýlyq saqtaý jáne bilim berý taqyryptary da tolǵandyrdy.
Sonymen qatar turǵyn úı-kommýnaldyq sharýashylyq jáne energetıka salasynda oblys ortalyǵynda JEO salý, gazdandyrý, Zerendi aýdanyn energııamen qamtamasyz etý máseleleri qoıyldy.
Jalpy, barlyq qoıylǵan suraqtarǵa Marat Ahmetjanov tolyq jaýap berdi. Brıfıngke barlyǵy 30-dan astam BAQ ókilderi men blogerler akkredıtteldi.
