Aqmola oblysy aýyl sharýashylyǵy sanaǵyna daıyndalyp jatyr

ASTANA. KAZINFORM – 2025 jyly Qazaqstan aýqymdy statıstıkalyq naýqanǵa – ulttyq aýyl sharýashylyǵy sanaǵyna daıyndalyp jatyr. 

Bul mańyzdy shara aldaǵy jyldary agrarlyq salanyń qalaı damıtynyna tikeleı áser etpek. Ásirese, el halqynyń jartysynan astamy aýyl sharýashylyǵymen aınalysatyn Aqmola oblysy úshin bul sanaqtyń mańyzy erekshe.

Sanaqtyń basty maqsaty – eldiń aýyldyq aımaqtarynda naqty ne bolyp jatqanyn shynaıy ári tolyq kórsetý. Atap aıtqanda aýylda kim qandaı sharýamen aınalysady, kimniń qansha jeri, tehnıkasy, maly bar, qandaı máseleleri bar jáne memlekettik qoldaýdy kimge qalaı baǵyttaý qajet ekenin anyqtaý maqsatynda.

Birinshi kezeń 2025 jyldyń maýsym aıynda bastalady. Bul kezde ıntervıýerler aldyn ala daıyndyq júrgizip, aýyl turǵyndarymen jumysqa kirisedi. Negizgi kezeń – 20 qyrkúıek pen 20 qazan aralyǵynda ótedi. Bul kezeńde iri aýyl sharýashylyǵy kásiporyndarynan bastap, shaǵyn sharýashylyqtarǵa deıin túgel qamtylady.

Azamattarǵa derekterdi tapsyrýdyń eki joly usynylady: sanaq.gov.kz portalynda onlaın túrde nemese ıntervıýer arqyly.

Búginde óńirde jumys toptary qurylyp, qyzmetkerlerge oqytý jumystary júrgizilýde.

Pılottyq saýalnamalar sanaq júıesiniń keń aýqymdy jumysqa daıyn ekenin kórsetti.

Uıymdastyrýshylar atap ótkendeı, barlyq derek qupııa saqtalady, al sanaqqa qatysý – ár azamattyń aýyl bolashaǵyna qosqan úlesi.

Aqmola oblysynyń aýdandarynda sanaqshylar jumysyn qamtamasyz etý, tehnıkalyq jabdyqtaý, kólikpen qamtý, naqty mekenjaılardy anyqtaý, saýalnama júrgizýge qolaıly oryndardy belgileý sııaqty jumystar atqarylyp jatyr.

Bul sózder tek uran ǵana emes – ómir shyndyǵy. Agrarlyq sala – elimizdiń ekonomıkasy men azyq-túlik qaýipsizdiginiń negizi. Sondyqtan bul salanyń artynda naqty adamdar, eńbekkerler, otbasylar tur. Solardyń úni estilip, eńbegi baǵalanýy úshin dál osyndaı sanaq mańyzdy.

Qazir aýyl turǵyndary bul bastamany burynǵydaı formaldylyq emes, óz ómirin, máselesin, eńbegin kórsetýge múmkindik retinde qabyldaı bastady. Al bul – aýyldyń shynaıy kelbetin aıqyndaýǵa jasalǵan úlken qadam.

Aıta keteıik, Astanada mereke qarsańynda qalalyq aýyl sharýashylyǵy jármeńkesi ótedi.