«Ákimder mektebi» jobasyna 2400-den asa aýdandyq jáne aýyldyq okrýg ákimderi qatysady
ASTANA. KAZINFORM - Elordada ótken juma kúni «AMANAT» partııasynyń bazasynda Úkimettiń Óńirlik saıasat jónindegi jobalyq keńsesi Saraptamalyq ortalyǵy ashyldy. Ol «Ákimder mektebi» jobasyn júzege asyrýmen, basqarý protsesterin tsıfrlandyrýmen, aýdandyq jáne aýyldyq okrýg ákimderine ekonomıkalyq damý baǵdarlamalaryn iske asyrýǵa kómektesýmen aınalysady.
Ortalyqtyń jumysymen Májilis spıkeri Erlan Qoshanov tanysty. Іs-sharaǵa Premer-Mınıstrdiń orynbasary Qanat Bozymbaev qatysty.
Belgili bolǵandaı, Memleket basshysy Qasym-Jomart Toqaev jaqynda ótken Úkimettiń keńeıtilgen otyrysynda tikeleı saılanǵan ákimderdiń jańa sanaty – saılanbaly basqarýshylar paıda bolǵanyn atap ótti. Olardyń arasynda muǵalimder, dárigerler jáne memlekettik qyzmette tájirıbesi joq basqa da mamandar bar. Sondyqtan Prezıdent «Ákimder mektebi» oqý jobasyn iske qosýdy tapsyrdy.
– Ákimderdi tikeleı saılaý – bul Prezıdenttiń negizgi reformalarynyń biri, eldi odan ári demokratııalandyrý jolyndaǵy úlken qadam. Qoǵam saılanǵan ákimdermen birge ózekti máselelerdi sheshýge belsendi túrde kirise bastady. Saılaýda jeńiske jetkenderdiń basym kópshiligi – bizdiń partııanyń ókilderi. Endi olardyń basty mindeti – saılaýshylardyń senimin aqtaý. Memleket basshysynyń tapsyrmasyna sáıkes, partııa Úkimetpen birlesip, saılanǵan ákimderdi jańa quzyretterge, zańdarmen jáne bıýdjetpen jumys isteýge úıretedi. Munyń barlyǵy halyqtyń ómir súrý sapasyn jaqsartý úshin kúndelikti jumysta kómektesedi, - dedi Erlan Qoshanov.
Májilis spıkeri aýyldy jan-jaqty damytý – Memleket basshysynyń saıasatynyń basymdyǵy ekenin atap ótti. Osyǵan baılanysty ótken jyly elimizegi jetekshi partııa eldiń barlyq óńirinde jańadan saılanǵan aýyl ákimderiniń forýmdaryn ótkizdi. Bul is-sharalarǵa oblys ákimderi qatysyp, saılanǵan basshylardyń alǵashqy jumys qorytyndylary jasaldy. Aýyl ákimderiniń ókilettikterin keńeıtý, sonyń ishinde olardyń bıýdjetterin ulǵaıtý boıynsha usynystar ázirlendi. Atap aıtqanda, endi aýyl ákimi kóshe saýdasy, qoǵamdyq oryndardy retteý máselelerin ákimshilik turǵydan basqara alady, sondaı-aq aýyl bıýdjetine jeke jáne zańdy tulǵalardyń múlik, jer, kólik salyqtary túsedi.
Óz kezeginde Úkimettiń Óńirlik saıasat jónindegi jobalyq keńsesin basqaratyn vıtse-premer Qanat Bozymbaev aýyldyq ákimderdiń derbestigin kúsheıtý boıynsha júıeli sharalar qabyldanatynyn atap ótti. Tsıfrlandyrý arqyly ákimder biryńǵaı aqparattyq júıelerge qol jetkizip, turǵyndardyń sany, mal basy, jeke qosalqy sharýashylyqtardyń jaǵdaıy jáne basqa da parametrler boıynsha tolyq statıstıkalyq aqparatqa ıe bolady. Vıtse-premerdiń aıtýynsha, ákimderde jetkilikti qarjylyq quraldar bolýy mańyzdy, sonda olar qajetti nátıjege qol jetkize alady.
«Ákimder mektebi» jobasy 2 400-den astam aýdandyq jáne aýyldyq okrýg ákimderin qamtıdy. Oqý kýrsy, basqa da taqyryptarmen qatar, aýyldyq okrýgterdiń ekonomıkalyq damý baǵdarlamalaryn ázirleý jáne olardy tájirıbede qoldaný ádistemesin úıretýge baǵyttalǵan. Ákimder óz aýyldarynyń ekonomıkalyq mamandandyrylýyn anyqtaýdy, sondaı-aq ónim óndirýden bastap, ony sertıfıkattaý men satýǵa deıingi tikeleı tizbekti qurýdy úırenedi.
«Qaryzsyz qoǵam» jobasynyń atqarýshy dırektory Oljas Ordabaev qazaqstandyqtardyń qarjylyq saýattylyǵyn arttyrý boıynsha atqarylǵan jumystardyń nátıjelerimen jáne aldaǵy josparlarmen bólisti. Keıingi eki jyl ishinde 840 myń adam oqytýdan ótti, onyń ishinde 70 myńy zańgerlik kómek aldy. Endi jobany keńeıtý maqsatynda oflaın oqytýmen qatar, kýrstar onlaın formatta da qoljetimdi bolady. Sonymen qatar zańgerlik keńesti mindetti oqýsyz alýǵa múmkindik týady, al halyqtyń yńǵaılylyǵy úshin «Qaryzsyz qoǵam» jobasynyń call-ortalyǵy ashylady.
Mamyr aıynyń sońyna deıin Úkimettiń Óńirlik saıasat jónindegi jobalyq keńsesi partııamen birlesip, eldegi barlyq aýyldyq okrýgtiń ekonomıkalyq damý baǵdarlamalaryn ázirleıdi jáne ákimderdi olardyń baǵdarlamalaryn iske asyrý barysynda súıemeldeıdi. Sondaı-aq ortalyq jeke qosalqy sharýashylyqtarda óndirilgen ónimderdi sertıfıkattaý jáne olardy uıymdastyrylǵan satyp alýlar men saýda jelileri arqyly satý máselelerimen aınalysady.