Aqqýdyń qyrylýyna Rixos Aktau-dyń qatysy bar-joǵy áli tekserilip jatyr - mınıstrlik
ASTANA. KAZINFORM – Ekologııa jáne tabıǵı resýrstar mınıstrligi Mańǵystaý oblysy Qarakól kólindegi aqqýlardyń jappaı qyrylýyna Rixos Aktau-dan tógiletin qaldyq sýdyń qatysy bar-joǵy zerthanalyq taldaýdan ótip jatyr.
«Tógindi boıynsha zerthanalyq taldaý jasalady. Onyń óz reglamenti bar. Zańbuzýshylyq rastalǵan jaǵdaıda tıisti sharalar qabyldanady. Lastaýshy zattardyń negizgi mólsheri 7 ıngredıentten aspaýy tıis. Shamamen 10 kúnge sozylatyn synaqtar da bar», — dedi Ekologııa jáne tabıǵı resýrstar mınıstrligi ekologııalyq retteý jáne baqylaý komıtetiniń tóraǵasy Jomart Álıev Úkimet otyrysynan keıin ótken baspasóz máslıhatynda.
Munyń aldynda Ekologııa jáne tabıǵı resýrstar vıtse-mınıstri Nurken Shárbıev Mańǵystaý oblysynda qyrylǵan aqqýlar jóninde pikir bildirgen edi.
Jýrnalıster vıtse-mınıstrden aqqý qyrylǵan Qarakólge Rixos Aktau qonaqúıinen sarqyndy sýdyń tógilýi qanshalyqty zańdy ekenin surady.
«Rixos-ke kelsek, ruqsat etilgen normalardan aýytqýǵa jol berilgen. Synama alyndy, túpkilikti qorytyndysy keıin aıtylady. Bul máselemen ekologııa departamenti aınalysyp jatyr, solar shara qoldanady. Tekserý qorytyndysy shyqqanyna qaraı aıyppul, ákimshilik sharalar, sýdy tazartý jáne taǵy basqalar bolady. Jobalaý kezinde sýdy tazartý qarastyrylǵan. Qonaq úı salynǵan kezde jergilikti atqarýshy organ sý tógýge ruqsat bergen bolsa kerek», — dedi vıtse-mınıstr.
Eske sala keteıik, Mańǵystaýda qyrylǵan aqqý sany 1 myńnan asyp ketti.
Aldyn ala málimet boıynsha, aqqýlardyń jappaı qyrylýy qus tumaýynan bolǵan.
Keıin Qarakólge Rixos-ten tógiletin qaldyq sýdyń qanshalyqty las ekeni jarııalandy.
