Aqkenttegi órt kezinde adamdardy qutqarǵan azamattar Prezıdent atynan marapattaldy

ALMATY. QazAqparat – Almaty ákimi Erbolat Dosaev Memleket basshysy Qasym-Jomart Toqaevtyń atynan «Aqkent» shaǵyn aýdanyndaǵy órt kezinde adamdardy qutqarǵan azamattarǵa memlekettik nagradalardy tabys etti, dep habarlaıdy QazAqparat tilshisi.

Atap aıtqanda, tótenshe jaǵdaıda kórsetken erligi men janqııarlyǵy úshin Memleket basshysynyń Jarlyǵymen «Erligi úshin» medalimen «Expo Masters» JShS menedjeri Tileýjan Ahmethanov, «Spark Elektromehanık» JShS elektrıgi Gıýnaı Shıýkrıý, «Spark Elektromehanık» JShS elektromehanıgi Eldar Ismaılov, «Gask Construction» JShS avtokran operatory Ierdelen Halıl, «Spark Elektromehanık» JShS elektromehanıgi Kenan Mamedov, sonymen qatar «Frank-Asia» JK avtokranynyń operatory Vadım Romanov marapattaldy.

«Bul qaıǵyly oqıǵa halqymyzdyń basqalar úshin qanshalyqty beıjaı, janashyr jáne táýekelge barýǵa daıyn ekenin kórsetti. Men sol bir tabıǵı apat kúni aınalyp ótpegen, órt sóndirýshilerge kómektesýge asyqqan barlyq janǵa alǵysymdy bildiremin. Dál osyndaı adam – jaýapty azamat, «Adal azamat» týraly Memleket basshysy jaqynda ótken quryltaıda aıtty. Bárimiz sondaı qamqor adam bolýǵa tyrysamyz», - dedi Erbolat Dosaev.

Sonymen birge, qala ákimi órtti kásibı ári jedel túrde aýyzdyqtaǵan órt sóndirýshilerge alǵysyn bildirdi.

Eske sala keteıik, 1 tamyz kúni 16 qabatty úıde órt tutanǵanyn habarlaǵan edik.

Qyzyl jalyn saǵat sol kúni 18:46 kezinde oqshaýlanyp, sóndirildi.

31 adam, onyń ishinde 16 bala aýrýhanaǵa jetkizilgen bolatyn. Amaly qalmaǵan turǵyndar balalaryn terezeden laqtyrdy. Zardap shekkenderdiń ishinde 2 júkti áıel bar.