Ákimder halyqqa jaqynyraq bola túsedi - Eldos Jumaǵulov

QARAǴANDY. QazAqparat – Qaraǵandy oblysynda 25 shildede aýyldyq okrýgter, aýyldar men kentter ákimin tikeleı saılaý bastalady. Mańyzdy saıası oqıǵa qarsańynda saıasattanýshy, E. A. Bóketov atyndaǵy QarÝ «Saıasattaný jáne áleýmettaný» kafedrasynyń aǵa oqytýshysy Eldos Jumaǵulov pikir bildirdi, dep habarlaıdy QazAqparat.

Ol mundaı saılaý birinshi kezekte halyq úshin mańyzdy ekenin atap ótti.

«Tikeleı saılaýda qandaı artyqshylyqtar bar? Birinshiden, ákimderdiń halyq aldyndaǵy jaýapkershiligi arta túsedi, óıtkeni olardy halyq tańdap, usynady. Olar joǵary turǵan organdardyń emes, halyqtyń tikeleı baǵynysynda bolady. Ekinshiden, halyq týǵan aýylynyń tynys-tirshiligine belsene qatysa alady. Sebebi, ákimdi tańdaı otyryp, aýyl turǵyndary oǵan óz múddesin qorǵaýǵa, ómir sapasyn jaqsartýǵa ókilettik beredi», – dep atap ótti Eldos Jumaǵulov.

Sonymen qatar, «Barlyǵyna qarsy» tarmaǵy da mańyzdy bolyp tabylady, dep qosty spıker.

Bul aýyl turǵyndaryna saılaý faktisine daý aıtpastan kandıdattarǵa senimsizdik bildirý quqyǵyn beredi.

Aıta keteıik, 25 shildede Qaraǵandy oblysynda 75 aýyl ákimin saılaý josparlanǵan.

Saılaý 134 myńnan astam adam turatyn 149 eldi mekende ótedi. Onda saılaýshylar sany 81 myńnan asady.

Saılaýdy ótkizýge 164 saılaý komıssııasy – 15 aýmaqtyq jáne 149 ýchaskelik komıssııa qatysady.