Ákim saılaýy: Jambyl oblysynda 24 áıel kandıdat retinde tirkelgen
Barlyq ýchaskelik saılaý komıssııalarynda arnaıy oqýdan ótken 625 adam jumys isteýde. Al 10 aýdannyń ortalyǵynda 70 adam jumylǵan. Bul týraly búgin ÓKQ alańynda Jambyl oblystyq saılaý komıssııasynyń tóraǵasy Serǵalı Aıdapkelov aıtyp berdi.
«Daıyndyq deńgeıimiz joǵary. Búginde ýchaskelik saılaý komıssııalarynyń daıyndyǵy 90% qurap otyr. Ýákiletti organdar kezdesýlerdiń kestesin jasady. Jergilikti atqarýshy organdar jáne jergilikti ózin-ózi basqarý organdary kandıdattarǵa saılaýshylarmen kezdesýi úshin sharttyq negizde 71 úı-jaı belgiledi. Jergilikti atqarýshy organdar tıisti saılaý komıssııalarymen birlesip, barlyq kandıdattar úshin úgittik baspa materıaldaryn ornalastyrý úshin 96 oryndardy anyqtady. Olardy aýdandyq gazetter betterinde habardar etip, aýdandyq ákimderiniń ınternet-betterinde ornalastyrdy», — dedi S.Aıdapkelov.
Aıta keteıik, aǵymdaǵy jyldyń 25 maýsymynda oblystaǵy aýdandyq saılaý komıssııalarynyń sheshimderimen 2017 jyly saılanǵan ákimderdiń ókilettikteri men ókilettikteri merziminen buryn toqtatylǵan 38 saılaý okrýginde — saılaý jarııalandy. Saılaý protsesi bastalǵannan beri oblystaǵy aýyldyq okrýg ákimderine jalpy sany 122 kandıdat usynyldy. Usyný merzimi aıaqtalǵan kúni ıaǵnı, 9 shilde, saǵat 18.00-de barlyq aýyldyq okrýgter boıynsha ár okrýgke 2-den kóp kandıdat usynylǵan.
Tirkeýden túsken kandıdattar da bar. Aýdandyq saılaý komıssııalary 14 shildede 116 kandıdatty tirkedi. 4 kandıdat túrli sebeptermen tirkeýden bas tartylǵan. Onyń ishinde 2-ýi óz kandıdatýralaryn qaıtaryp alý týraly ótinish beripti. Al 2 úmitkerdi tirkeý týraly sheshimniń kúshi joıylǵan.
Aıta ketý kerek, naýqanǵa názik jandylar da belsendi qatyspaq. Aıtalyq, jalpy tirkelgen 116 kandıdattyń ortasha jasy 39,9 jasty quraıdy desek, olardyń 24-i áıelder.