Ákim saılaýy: Almaty oblysynda 279 úmitker usynyldy
Ortasha básekelestik deńgeıi 3,9 adamnan keledi. Usynylǵan 279 úmitkerdiń 249-y - er, 30-y - áıel azamatshalar. Úmitkerlerdiń ortasha jasy - 41,3 jas. Bul týraly búgin Taldyqorǵanda óńirdegi aýyldyq okrýgterdiń ákimderine úmitkerlerdi usyný qorytyndylary týraly ótken brıfıng barysynda oblystyq aýmaqtyq saılaý komıssııasynyń múshesi Qaharman Jaqsylyq aıtty .
Qaharman Jaqsylyqtyń sózine súıensek, jalpy Almaty oblysynda 71 aýyldyq okrýgte ákimder saılaýy ótedi. Bul rette 60 ákim ókilettik merziminiń aıaqtalýyna baılanysty, 11-i ókilettikterin merziminen buryn toqtatýǵa baılanysty saılanady. Óz kandıdattaryn usynǵan saıası partııalar qatarynda «Nur Otan» partııasy, «Aýyl» HDPP, «Aq Jol» QDP, «ADAL» SP, QHP, JSDP bar.
«Usynylǵandar arasynda 154 úmitker - jumys istep júrgen memlekettik qyzmetshiler, 32-i - kommertsııalyq qurylymdardyń ókilderi, 70-i - bıýdjettik uıymdardyń qyzmetkerleri, 10-y ýaqytsha jumys istemeıdi, 3-i - qoǵamdyq birlestikterdiń ókilderi, 6-y - ózin-ózi jumyspen qamtyǵandar, 3-i ishki ister jáne áskerı salalardyń zeınetkerleri. Arasynda ǵylymı dárejesi bar kandıdat ta bar», - dedi Q. Jaqsylyq.
Bıylǵy jylǵy 10 shildedegi derek boıynsha 159 úmitker tirkelgen (56,6%).Túrli sebepter boıynsha 23 úmitker alynyp tastaldy, onyń 16-sy talaptarǵa sáıkes kelmeıdi, 7-i óz kandıdatýrasyn alyp tastaý týraly ótinishterine sáıkes shyǵaryldy.
Eske salsaq, 25 mamyrda Prezıdent Qasym-Jomart Toqaev saılaý týraly Konstıtýtsııalyq zańǵa ózgertýler men tolyqtyrýlar engizýdi kózdeıtin qujatqa qol qoıǵan bolatyn.
Ulttyq ekonomıka mınıstrligi aýyl ákimerin tikeleı saılaý qalaı ótetindigin jáne QR Prezıdenti Ákimshiligi Basshysynyń orynbasary Málik Myrzalın ákim saılaýyna túsetin kandıdattarǵa qoıylatyn talaptardyń sebebin túsindirdi.
Sondaı-aq, Memleket basshysy aýyl ákimderin saılaý máseleleri jóninde keńes ótkizdi.