Ákim saılaýy: Aqmola oblysynda bir orynǵa neshe úmitker talasady

NUR-SULTAN. QazAqparat – Aqmola oblysyndaǵy óńirlik saılaý komıssııasynyń hatshysy Nıkolaı Polıtkın saılaý ýchaskeleriniń ákimderdi saılaýǵa daıyndyǵy týraly málimet berdi, dep habarlaıdy QazAqparat tilshisi.

«Erteńgi saılaýǵa 218 ýchaskelik saılaý komıssııasy qatysady. Barlyq ýchaskeler daıyn. Keshe barlyq komıssııalarǵa saılaý bıýlletenderi taratyldy. Saılaý komıssııalarynyń jumys tártibi týraly keńes ótkizdik», - dedi Nıkolaı Polıtkın agenttik tilshisine telefon arqyly bergen málimetinde.

Onyń aıtýynsha, búgin tańerteń oblys boıynsha 10 348 daýys berýshi tirkelgen. Óńirlik komıssııa hatshysy keshke deıin bul san ózgerýi múmkin ekenin aıtady.

«Barlyǵy 303 kandıdat tirkeldi. Onyń ishinde ártúrli sebeppen 13 kandıdat tirkeýden ótpedi. 290 kandıdattyń taǵdyry erteń belgili bolady», - dedi Nıkolaı Polıtkın.

Jalpy erteń Aqmola óńiri boıynsha barlyǵy 95 ákim saılanady. Onyń ishinde aýdandyq mańyzdaǵy qalalardyń eki ákimi (Ereımentaý jáne Derjavınsk qalalary) bar. Qalǵany – kentter men aýyldyq okrýgter.

«Mundaı saılaý alǵash ret ótkizilip otyr. Bul bizdiń azamattarymyz úshin óz ómirlerine ózderi áser etýdiń naqty múmkindigi. Máselelerdi sheshe alatyn laıyqty adamdy kórip, tańdaýdyń ońtaıly sáti týyndap tur. Eseptep qarasaq, bizdegi ár ákimniń ornyna úsh úmitker talasyp otyr», - deıdi saılaý komıssııasynyń ókili.