Aqyly joldar nege kóbeıip jatyr
ASTANA. KAZINFORM — Qazir elimizde 3,6 myń shaqyrym avtojol aqyly negizde qyzmet etedi. Al jyl sońyna deıin bul kórsetkish 4 myń shaqyrymǵa deıin uzarmaq.
— Aqyly joldar tek respýblıkalyq tas joldarda engizilgen. Ózderińiz bilesizder, byltyr kóptegen úlken joba aıaqtaldy. Qaraǵandy-Almaty, Taldyqorǵan-Óskemen, sonymen qatar Aqtóbe-Astrahan baǵyttaryndaǵy joldardyń jumysy tolyqtaı bitti. Bul joldar baıaǵyda 2 jolaqty, ІІІ tehnıkalyq sanattaǵy joldar bolsa, búginde І sanatqa aýystyryldy, ıaǵnı 4 jolaqty jolǵa aýysyp otyr. Atap aıtý kerek, aqyly joldardyń barlyǵy — qaıta jańartýdan ótken jáne kúrdeli jóndeý jumystary júrgizilgen joldar, — deıdi Kólik mınıstrligi Avtomobıl joldary komıtetiniń basqarma basshysy Ǵabıt Shymyrbaev.
Mınıstrlik ókili elimizde aqyly joldar nege kóbeıip jatqanyn túsindirdi.
— І sanattaǵy joldardy jyl boıy kútip ustaý úshin qomaqty qarajat kerek. Respýblıkalyq bıýdjetke aýyrtpalyq túsirmeı, joldardyń shyǵyny ózin-ózi jabý úshin aqyly joldar engiziledi, ıaǵnı aqyly joldan túsken qarajat tolyǵymen sol joldardy kútip ustaýǵa jumsalady. Bul jumystar keıin de jalǵasady. Úkimet otyrysynda da osy másele talqylandy. Bıyl jospar boıynsha 4000 shaqyrymǵa deıin aqyly joldar iske qosylady, — dedi Ǵabıt Shymyrbaev.
Aıta keteıik, elimizde І tehnıkalyq sanattaǵy jalpy uzyndyǵy 2 161 km bolatyn 11 aqyly ýchaske bar. Al ІІ jáne ІІІ tehnıkalyq sanattaǵy 7 ýchaskeniń uzyndyǵy — 1 514 km.
Elimizdegi aqyly joldardyń tizimi:
1. Astana — Şýchınsk (2013 jyldan bastap)
2. Astana — Temirtaý (2019 jyldyń qańtarynan bastap)
3. Almaty — Qorǵas (2019 jyldyń qańtarynan bastap)
4. Almaty — Qonaev (2019 jyldyń qańtarynan bastap)
5. Astana — Pavlodar (2021 jyldyń 23 qarashasynan bastap)
6. Taraz — Qaınar (2021 jyldyń 23 qarashasynan bastap)
7. Shymkent — Qyzylorda (2021 jyldyń 23 qarashasynan bastap)
8. Shymkent — Taraz (2021 jyldyń 23 qarashasynan bastap)
9. Shymkent — Ózbekstan shekarasy (2021 jyldyń 23 qarashasynan bastap)
10. Qonaev — Taldyqorǵan (2021 jyldyń 23 qarashasynan bastap)
11. Şýchınsk — Kókshetaý (2021 jyldyń 23 qarashasynan bastap)
12. Pavlodar-Qalbataý (2023 jyly 8 qazanynan bastap)
13. Beıneý-Aqjigit (2023 jyly 9 qazanynan bastap)
14. Oral-Samara (2023 jyly 10 qazanynan bastap)
15. Pavlodar-Omby (2023 jyly 14 qazanynan bastap)
16. Kókshetaý-Petropavl (2023 jyly 16 qazanynan bastap)
17. Oral-Saratov (2023 jyly 1 jeltoqsanynan bastap)
18. Qyzylorda-Aral ýchaskesi (2025 jylǵy 26 qańtardan bastap).
Buǵan deıin aqyly joldarǵa tólenetin tarıf qalaı ózgeretinin habarlaǵan edik.