«Aqyldy kameralar» qandaı zań buzýdy anyqtaıdy
ASTANA. KAZINFORM — Búginnen bastap Qazaqstanda jol qozǵalysy erejelerin buzýdy tirkeýdiń jańa tártibi iske qosyldy. Endi avtomatty rejımdegi kameralar men aqyldy júıeler «qaýipsizdik beldigin taqpaý» jáne «kólik júrgizý kezinde telefon paıdalanýdy» tirkep, aıyppuldy tikeleı rásimdeıdi.
Bul jańashyldyq Ákimshilik quqyq buzýshylyq týraly kodekske ózgeris engizýmen tikeleı baılanysty.
Buryn mundaı zań buzýshylyqtardy negizinen polıtsııa qyzmetkerleri anyqtaǵan bolsa, endi olar avtomatty túrde jazylady. Al jaýapkershilik kólik ıesine júkteledi.
— Bıylǵy jyldyń 12 naýryzynda tsıfrlyq kodeks aıasynda qabyldanǵan ÁQB týraly kodekstiń 31-babyna ózgerister kúshine enedi. Atalǵan ózgerister tehnologııalardyń damýyna jáne protsessterdiń tsıfrlandyrylýyna baılanysty engizildi. Negizgi maqsat — zamanaýı tehnıkalyq sheshimderdi qoldaný arqyly jol qaýipsizdigin arttyrý, quqyq buzýshylyqtardyń aldyn alý tıimdiligin kúsheıtý. Mańyzdysy, jańadan tyıymdar engizilmeıdi. Tek burynnan bar quqyqbuzýshylyqtardy anyqtaýdyń tehnıkalyq múmkindikteri keńeıtiledi, — dedi QR ІІM Ákimshilik polıtsııa komıtetiniń aǵa ınspektory Aqtoty Boranova.
Demek júrgizýshiler endi tek polıtsııany kórgende ǵana emes, árdaıym jol erejesin saqtaýǵa daǵdylanýy kerek. Bul qaýipsizdik mádenıetin qalyptastyrýǵa jasalǵan qadam.
Buǵan deıin avtomatty júıeler quqyq buzýshylyqtyń 6 túrin tirkeıtin: jyldamdyqty arttyrý, baǵdarshamnyń tyıym salatyn sıgnalyna ótý, jol belgileri men tańbalaryn saqtamaý, durys toqtamaý nemese turaq erejesin buzý, ozý qaǵıdalaryn buzý jáne jaıaý júrginshilerge jol bermeý. Endi olardyń múmkindigi keńeıtiledi.
Sonymen birge, mindetti saqtandyrý polısiniń bolmaýy, tehnıkalyq baıqaýdyń merziminiń ótýi jáne zańnamada kózdelgen ózge de qujattyq sıpattaǵy zań buzý avtomatty túrde tirkeletin bolady.