Aqberen Elgezek Qazaqstanda «Ádebıet akademııasyn» qurýdy usyndy

ASTANA. QazAqparat - QR Mádenıet jáne sport mınıstri Arystanbek Muhamedıulynyń tóraǵalyǵymen QR Ulttyq Akademııalyq kitaphanada otyzǵa tarta jas aqyndar men jazýshylardyń qatysýymen Jastar keńesiniń forýmy ótti, dep habarlaıdy QazAqparat tilshisi.

Aıta ketsek, ulttyq ádebıet pen aqyndyq ónerdi qoldaý jáne nasıhattaý maqsatynda QR Mádenıet jáne sport mınıstrligi janynan Jastar keńesi qurylǵan bolatyn. Jastar keńesi - óner jáne ádebıet salasynda ádistemelik-saraptamalyq jumysty júzege asyratyn konsýltatıvtik-keńestik organ bolyp tabylady.

Budan keıin Mádenıet jáne sport mınıstri, Jastar keńesiniń tóraǵasy Arystanbek Muhamedıulynyń buıryǵymen Jastar Keńesi tóraǵasynyń orynbasary bolyp Aqberen Elgezek, al Keńestiń hatshysy bolyp Baýyrjan Qaraǵyzuly bekitilgeni habarlanǵan edi.

Búgin ótken keńestiń alǵashqy forýmynda «Jastar ádebıetiniń búgingi jaı-kúıi», «Rýhanı jańǵyrý» baǵdarlamasy aıasynda otandyq ádebıetterdi shetelge nasıhattaý» syndy ózekti máseleler kóterilip, jas aqyn-jazýshylar óz usynys-pikirlerin jetkizdi.

«Mınıstrlik jas qalamgerlerdi qoldaý maqsatynda jyl saıyn  «Jas tolqyn» serııasymen jas býyndardyń eńbekterin jaryqqa shyǵaryp otyrady. Osy jyly atalmysh serııamen Qýat Qıyqbaıdyń «Beıýaqyt» jáne Baǵashar Tursynbaıulynyń «Til men júrek» syn maqalalary shyǵaryldy. QR «Mádenıet týraly» Zańyna ózgerister engizip,  qoǵamdyq mańyzy bar ádebıetti satyp alý, basyp shyǵarý jáne taratý qaǵıdalaryn bekitilgen edi. Osy rette, 2017 jylǵa qoǵamdyq mańyzy bar ádebıetti satyp alý boıynsha komıssııalardyń sheshimimen 52 shyǵarma satyp alyndy», - dedi vedomstvo basshysy.

Qoǵamdyq mańyzy bar ádebıetti satyp alýdyń negizgi maqsaty jazýshylarǵa qalamaqy tóleı otyryp, jańa taqyrypta, jańa baǵytta shyǵarmalardy shyǵarý, jas qalamgerlerdiń tolqynyn artyrý bolyp tabylady.

Jıynda «Jastar ádebıetiniń búgingi jaı-kúıi» jaıly Qazaqstan Jazýshylar odaǵy tóraǵasynyń birinshi orynbasary Aqberen Elgezek sóz tizginin aldy.

«Jastar ádebıetiniń jetistikteri týraly aıttyq. Alaıda, jastardyń barlyǵy talantty bolǵanmen, bári genıı emes. Shyǵarmashylyq adamyna ómirbaqı kemeldený qajet, izdený qajet. Sol sebepten, men Qazaqstanda joǵary oqý ornyndaı mártebesi bar «Ádebıet akademııasyn» qurýdy usynamyn. Bul Akademııada múıizi qaraǵaıdaı, klassık qalamgerlerimizdiń sheberhanalary jumys istep tursa... Qazirgi tehnologııalardy paıdalana otyryp, jaqyn jáne alys shetel ıntellektýaldarynyń onlaın lektsııalary taratylyp oqytylsa, Akademııada tegin aǵylshyn jáne ózge de álem tilderi kýrstary jumys istep tursa deımiz. Sodan keıin. Máselen, Tynyshtyqbek Ábdikákimulynyń nemese Esenǵalı Raýshanov, ne Qabdesh Jumadilov pen Beksultan Nurjekeniń sheberhanalaryna túsken jas qalamgerlerge ortaq lektsııalar júrip tursa degen tilek bar. Bul jalǵyz ádebıetke ǵana emes, jalpy qoǵam sanasynyń ıntellektýaldyq damyp-ósýine salynǵan zor ınvestıtsııa bolar edi», - dedi ol.

Aqberen Elgezektiń usynysyna vedomstvo basshysy tarapynan qoldaý tabylyp, Prezıdent Ákimshiligimen birlese jumystar atqarýǵa ýəde etildi. Sondaı-aq, jıynda Jazýshylar odaǵynyń Astana qalalyq fılıalynyń dırektory Baýyrjan Qaraǵyzuly da sóz alyp, óz usynystaryn jetkizdi.