Akademııalyq ýnıversıtetter qurý qajet – ǵalym

ALMATY. QazAqparat - QR Bilim jáne ǵylym mınıstrligi alǵash ret uıymdastyrǵan «Úzdik ǵylymı qyzmetker – 2021» baıqaýynda 6 ǵylymı-zertteý ınstıtýty men 16 joǵary oqý ornynyń 50 ǵalymy úzdik dep tanyldy. Olardyń 7-eýi ál-Farabı atyndaǵy Qazaq ulttyq ýnıversıtetiniń ǵalymy, dep habarlaıdy QazAqparat tilshisi.

Joǵary marapatqa ıe bolǵandardyń biri áleýmettaný jáne áleýmettik jumys kafedrasynyń professory Gúlnafıs Ábdikerova.

«Bıyl birinshi ret ótkizilgen respýblıkalyq baıqaý elektrondy túrde táýelsiz sarapshylardyń qatysýymen júzege asty. Bul búkil kezeńderdiń ashyq jáne barlyq qatysýshylarǵa qoljetimdi túrde ótýine múmkindik berdi. Baıqaý QR Prezıdentiniń tapsyrmasymen memlekettiń ǵylym salasyna engizip otyrǵan jańalyǵy jáne birinshi kezekte ǵalymdardyń eńbegin laıyqty baǵalaýǵa baǵyttalǵan. Meniń oıymsha, bul áleýmettik, qoǵamdyq sala mamandaryna óz zertteýleri men jańalyqtaryn tájirıbege engizýge zor ynta beretin joba», – deıdi Gúlnafıs Ábdikerova.

QazUÝ-dyń geografııa jáne tabıǵatty paıdalaný fakýlteti rekreatsııalyq geografııa jáne týrızm kafedrasynyń dotsenti Lázzat Spanqulovanyń pikirinshe, zertteý ýnıversıtetteri men ǵylymı-zertteý ınstıtýttarynyń áriptestigi negizinde akademııalyq ýnıversıtetter qurý qajet.

«Joǵary oqý oryndary, ǵylymı-zertteý ınstıtýttary men joǵary tehnologııalyq óndiristik kompanııalardyń ózara belsendi yntymaqtastyǵy qazaqstandyq ǵylymnyń sapaly qoldanbaly nátıjeler berýge daıyn emestigi týraly stereotıpti joıýǵa yqpal etedi. Zertteý ýnıversıtetteri men ǵylymı-zertteý ınstıtýttarynyń áriptestigi negizinde akademııalyq ýnıversıtetter qurý qajet. Nátıjesinde stýdentter Ǵylym akademııasy bazasynda naqty jobalardy júzege asyra alady», – deıdi ǵalym.

Sondaı-aq júldeni bilim ordasynan Teorııalyq jáne ıadrolyq fızıka kafedrasynyń dotsenti Qýantaı Boshqaev, Plazma fızıkasy jáne kompıýterlik fızıka kafedrasynyń professory, fızıka-tehnıkalyq fakýltetiniń dekany Asqar Dáýletov, Matematıkalyq jáne kompıýterlik modeldeý kafedrasynyń professory m.a. Álibek Isahov, Epıdemıologııa, bıostatıstıka jáne dáleldi medıtsına kafedrasynyń qaýymdastyrylǵan professory, Densaýlyq ǵylymı-zertteý ınstıtýtynyń dırektory Qaırat Davletov, Keden, qarjy jáne ekologııalyq quqyq kafedrasynyń dotsenti Gúldana Qýanálıeva ıelendi.

Aıta keteıik, «Úzdik ǵylymı qyzmetker – 2021» baıqaýynyń jeńimpazdaryna 6 mln teńge kóleminde qarjylaı syıaqy taǵaıyndaldy.