Akademııalyq adaldyq lıgasyna kiretin 16 JOO jumysyna qanaǵattaný deńgeıi anyqtaldy

ASTANA. QazAqparat – Akademııalyq adaldyq lıgasyna kiretin 16 qazaqstandyq JOO stýdentteri arasynda júrgizilgen saýalnama osy bilim mekemeleriniń qyzmetine qanaǵattaný deńgeıi 79,9% ekenin kórsetti. Bul týraly Akademııalyq adaldyq lıgasynyń jalpy jınalys-forýmynda málim boldy, dep habarlaıdy QazAqparat.

«Akademııalyq adaldyq lıgasy» JOO-lar qaýymdastyǵynyń baspasóz qyzmeti taratqan aqparatqa sáıkes, saýalnamaǵa 23 457 bilim alýshy – lıga músheleri qatysqan.

Saýalnama 10 negizgi sanat boıynsha júrgizildi: akademııalyq adaldyq; pánderdi oqytý jáne baǵalaý; baǵalaý jáne keri baılanys; tirkeý kezinde pánderdi tańdaý; jeke damý; akademııalyq qoldaý; aqparattyq resýrstar men qyzmetter, qatysý, materıaldyq-tehnıkalyq baza jáne kampýs, qashyqtyqtan oqytý.

Paıdalanylǵan esepteý ádistemesine sáıkes, lıgaǵa múshe joǵary oqý oryndary boıynsha qanaǵattanýdyń ortasha deńgeıi – 79,9%.

«Akademııalyq adaldyq lıgasy jalpy joǵary bilim berýdiń damýyna áser etetin akademııalyq, adaldyq pen ádilettilik araly retinde qabyldanady. Akademııalyq adaldyq lıgasynyń róli – bizdiń ómirimizdi jaqsy jaqqa ózgertetin oqý protsesi arqyly elimizdiń qurmetti, laıyqty azamatyn daıyndaý», - dedi Ǵylym jáne joǵary bilim vıtse-mınıstri Qýanysh Erǵalıev.

Forým aıasynda joǵary oqý oryndarynyń ózin-ózi retteýi, sybaılas jemqorlyqqa qarsy is-qımyl, akademııalyq adaldyq mádenıetin damytý tetikteri jáne alqalylyq arqyly sapany qamtamasyz etý sııaqty ózekti máselelerine arnalǵan pikirtalas ótti.