Aq úı: AQSh-tyń Qytaıǵa yqpal etetin birneshe tetigi bar
ASTANA. KAZINFORM – AQSh Qytaıǵa yqpal etýdiń eleýli tetikterine ıe. Bul týraly Aq úı apparaty basshysynyń orynbasary Stıven Mıller Fox News telearnasyna bergen suhbatynda aıtty, dep jazady TASS.
– AQSh Qytaıǵa yqpal etýdiń mańyzdy ári senimdi tetikterine ıe. Eń aldymen, biz bul eldi jáne onyń búkil damýy men ındýstrııalanýyn tolyǵymen qarjylandyryp otyrmyz. Bizde basqa da tetikter bar, ol týraly tereń toqtalǵym kelmeıdi, biraq Qytaıdyń qaýipsizdigi úshin asa mańyzdy kóptegen nárseler bar, bul turǵyda olar AQSh-qa muqtaj. Sondyqtan Qytaı deeskalatsııa jolyn tańdasa óte oryndy bolar edi, – dedi ol.
AQSh prezıdenti Donald Tramp 2 sáýir kúni 185 el men aýmaqtan keletin taýarlarǵa kedendik baj salyǵyn engizetinin jarııalady. Al 9 sáýirde ol kelissózge daıyndyq tanytqan 75 elge qatysty bul salyqty 90 kúnge toqtatatynyn málimdedi. Bul elderge 10% kóleminde ımporttyq tarıf qoldanylady. Alaıda bul shara Qytaıdy aınalyp ótti.
Aıta keteıik, Aq úı Amerıkanyń Qytaıdan jetkizilim bajy 125 paıyz emes, 145 paıyz bolatynyn eskertken edi.
Oǵan jaýap retinde Qytaı AQSh taýarlaryna baj salyǵyn 125 paıyzǵa deıin kóterdi.
Qytaı Syrtqy ister mınıstrligi Mao Tszedýnnyń «AQSh — tek qaǵaz jolbarys, túrtip qalsaq tesiledi» degen áıgili sózin eske túsiretin jazba jarııalady.
Qosa keteıik, Kazinform tilshisi AQSh-Qytaı arasyndaǵy tarıf saıasatynyń sebep-saldaryn, qarjy naryǵy men elimizge tıgizer áserin taldady.