Air Astana Tokıoǵa kez kelgen ýaqytta áýe reısin bastaı alady

ASTANA. QazAqparat - Air Astana kompanııasy Tokıoǵa kez kelgen ýaqytta áýe reısin bastaı alady. Bul týraly búgin Qazaqstan-Izraıl saýda-ekonomıkalyq yntymaqtastyq jónindegi komıssııasynyń 7-shi otyrysy aıasynda BAQ ókilderine suhbat bergen QR Investıtsııalar jáne damý mınıstrliginiń Azamattyq avıatsııa komıteti tóraǵasynyń orynbasary Talǵat Lastaev málim etti, dep habarlaıdy QazAqparat.

«Tokıo boıynsha bizde kelisimge qol qoıylǵan. Demek, quqyqtyq negiz bar degen sóz. Bul rette aptasyna 14 reıske deıin oryndalýy qajet», - dedi ol.

Onyń atap ótýinshe, Qazaqstan men Japonııa arasyndaǵy sáıkesinshe memorandýmǵa taıaýdaǵy QR Prezıdenti Nursultan Nazarbaevtyń Tokıoǵa resmı sapary aıasynda qol qoıylǵan.

«Ol ushýlarǵa tolyqtaı quqyq beredi. Buǵan deıin Tokıo áýejaıy júktemesiniń kóptigine baılanysty mundaı múmkinshilik bolmaǵan edi. Biz kelissózder protsessin uzaq ýaqyt júrgizip, nátıjesinde degenimizge qol jetkizdik. Endigi ýaqytta bizde Tokıonyń Narıta áýejaıyna ushýǵa múmkindik bar. Buǵan deıin Osaka áýejaıy bolǵan edi. endigi ýaqytta barlyq quqyqtyq negiz qalyptasty. Kompanııa kez kelgen ýaqytta ushýlaryn bastaı alady», - dedi Lastaev.