Air Astana 15 Boeing ushaǵyna tapsyrys berdi
ASTANA. KAZINFORM — Air Astana Boeing kompanııasymen alys qashyqtyqqa arnalǵan 15 Boeing 787-9 Dreamliner ushaǵyn jetkizý týraly kelisimshartqa qol qoıdy. Bul týraly Azamattyq avıatsııa komıtetiniń baspasóz qyzmeti habarlady.
Áýe kompanııasy tarıhyndaǵy bul eń iri tapsyrys: oǵan rastalǵan bes ushaq, bes optsıon jáne bes satyp alý quqyǵy kiredi. Kelisimshartty Air Astana dırektorlar keńesi maquldap, qazirgi ýaqytta qajetti korporatıvtik rásimder aıaqtalý ústinde.
Bul tapsyrys 2026-2027 jyldary jetkizilýi josparlanǵan úsh Boeing 787-9 ushaǵyna qatysty kelisimshartty tolyqtyrady. Osylaısha, jalpy tapsyrys kólemi 18 áýekemesine deıin ulǵaıdy. Jańa ushaqtar 2032-2035 jyldar aralyǵynda jetkiziledi. Qozǵaltqyshtarymen qosa eseptegende, Boeing 787-9 Dreamliner ushaǵynyń 18 danasynyń jalpy quny 7 mıllıard AQSh dollaryn quraıdy.
«Air Astana aldaǵy onjyldyqta Ortalyq Azııa men Kavkaz óńirinen Azııaǵa, Eýropaǵa jáne álemniń basqa aımaqtaryna ushý múmkindikterin keńeıtý strategııasyn dáıekti túrde júzege asyryp keledi. Kelesi jyly alǵashqy Boeing 787-9 Dreamliner ushaǵynyń jetkizilýi kompanııa damýynyń jańa kezeńin ashady. Dreamliner jaıly salonymen, otyn únemdiligimen jáne ártúrli baǵyttarda tıimdi paıdalanýǵa múmkindik beretin ıkemdiligimen erekshelenedi. Bul úlgidegi 18 ushaqtan turatyn flot jolaýshylarymyzǵa qyzmet pen jaılylyqtyń jańa deńgeıin usynady.» - dedi Air Astana kompanııasynyń bas atqarýshy dırektory Pıter Foster.
Air Astana kompanııasy Boeing áýe kemelerin uzaq jyldar boıy sátti paıdalanyp keledi. Kompanııa óz qyzmetin 2002 jyly Boeing 737-700/800 ushaqtarymen bastap, Qazaqstan ishindegi jáne Ortalyq Azııa elderine reıster oryndady. 2003 jyly flotqa Boeing 757-200 ushaqtary qosylyp, Azııa men Eýropa baǵyttaryna alys reıster ashyldy. Boeing 737 jáne Boeing 757 ushaqtary 2007 jáne 2020 jyldary paıdalanýdan shyǵaryldy. 2013 jyly kompanııa áýeparki úsh jańa Boeing 767-300ER ushaǵymen tolyqty, olar búginde halyqaralyq jáne suranysy joǵary ishki baǵyttarda qoldanylady.
Aıta keteıik, Almaty men Alataý qalalarynda áýe taksıi iske qosylady.