Aıda Balaeva Túrkistanda restavratorlar daıarlaýdy usyndy

ASTANA. KAZINFORM – «Túrkistan qalasynda restavratorlardy oqytý jobasyn usynamyz». Astanada ótken Túrki mádenıeti men murasy qory keńesiniń II otyrysynda QR Mádenıe jáne aqparat mınıstri Aıda Balaeva osyndaı bastama kóterdi.

— Túrki mádenıeti men murasy qory asa qundy mádenıet jáne tarıhı eskertkishterdi saqtaýdyń mańyzdy mıssııasyn atqaryp keledi. Búginde bizdiń elderimiz úshin tarıhı jáne mádenı murany saqtaý máselesi ózekti. Ejelgi eskertkishter men artefaktilerdiń jaǵdaıyna ýaqyt, klımattyń ózgerýi jáne antropogendik faktor áser etýde. Sondyqtan mundaı nysandardy konservatsııalaý jáne restavratsııalaý salasynda bilikti mamandarǵa qajettilik ósýde. Osy aıtylǵandardy eskere otyryp biz Túrkistan qalasynda restavratorlardy oqytý jobasyn iske asyrý bastamasyn usynamyz. Semınar ártúrli elderdiń restavratorlary arasynda tájirıbe almasý alańyna aınalyp, bolashaqta birlesken jobalardy iske asyrýǵa yqpal etetin bolady, - dedi Aıda Ǵalymqyzy otyrysty asha otyryp. 

Sondaı-aq mınıstr bıyl álemdik kóshpeli mádenıet oshaǵynda «Botaı jáne Turan - túrki áleminiń negizderi» taqyrybynda semınar uıymdastyrylǵanyn aıtty. Onyń maqsaty – túrki órkenıeti damýynyń túrli tarıhı kezeńderin qaıta jańǵyrtý jáne kórsetý. 

Aıta keteıik, Túrki mádenıeti men murasy qory keńesiniń II otyrysyna osy uıymnyń prezıdenti Aqtoty Raıymqulova, sondaı-aq Túrki memleketteri uıymynyń bas hatshysy Kýbanychbek Omýralıev, Ázerbaıjan Respýblıkasynyń Mádenıet mınıstri Ádil Kerimli, Qyrǵyzstannyń mádeneı, aqparat jáne sport vıtse-mınıstri Gúlbara Ábdiqalyqova syndy birqatar kórshiles elderden kelgen meımandar qatysty. 

Buǵan deıin Astanadaǵy ulttyq mýzeıde «Dıýanı luǵat at-túrk» sózdiginiń 950 jyldyǵyna oraı halyqaralyq kórme ashylǵanyn jazǵan edik.