AI-92 benzıni men dızeldiń qory bir aıǵa jetedi – QMG

ASTANA. QazAqparat – «QazMunaıGaz» ulttyq kompanııasy basqarma tóraǵasynyń orynbasary Dáýletjan Hasanov búgingi Úkimet otyrysynda munaı óńdeý zaýyttaryndaǵy benzın men dızel qory týraly málimet berdi, dep habarlaıdy QazAqparat tilshisi.

«Jalpy elimiz boıynsha bir aıǵa tutynýǵa jetkilikti kólemde AI-92 markaly benzıni men dızel qory bar. Al AI-98 markaly benzınniń qory 2 aptaǵa jetedi», - dedi ol.

Sondaı-aq kompanııa ókili batys óńirlerdegi tótenshe jaǵdaıǵa toqtaldy.

«Keshe tústen keıin syrtqy jeliler tarapynan elektr energııasynyń óshýine baılanysty Atyraý munaı óńdeý zaýytynyń jumysy toqtatyldy. Dál osyndaı sebeppen Qarabatandaǵy gaz-hımııa keshenindegi jumys ta apattyq jaǵdaıda toqtatyldy. Elektrdiń óshýiniń saldarynan Atyraý munaı óńdeý zaýytynyń barlyq tehnologııalyq qondyrǵylary qaýipsiz toqtatyldy.

Avarııalyq jaǵdaıdyń aldyn alý jáne qyzmetkerlerdiń qaýipsizdigin qamtamasyz etý úshin apatty joıý algorıtmine sáıkes barlyq qondyrǵylardan kómirsýtegi gazy alaýǵa jiberildi.

3 shildege qaraǵan túni elektr qýatyn qaıta berý bastalǵannan keıin zaýyt qolda bar qorlardan munaı ónimderin jóneltýdi qaıta bastady. Atyraý munaı óńdeý zaýyty rezervýarynda búgingi tańda 26 myń tonna avtobenzın, 33 myń tonna dızel, 1200 tonna suıytylǵan munaı gazy bar. Bul kólemder 7 kúnge turaqty jóneltýge jetkilikti», - dedi Dáýletjan Hasanov.

Eske salaıyq, keshe keshke Atyraýda birneshe shaǵynaýdanda jaryq sónip qalǵan bolatyn.

Artynsha jergilikti energetıkalyq keshenniń baspasóz qyzmeti elektr qýatynyń óshý sebebin aıtty.

Saǵat 21.30-da Atyraý oblysy ákimdigi jaryqtyń janǵanyn habarlady.

Prezıdent Qasym-Jomart Toqaev Atyraý munaı óńdeý zaýyty men Mańǵystaý atom energetıka kombınatynda týyndaǵan jaǵdaı boıynsha memlekettik komıssııa qurýdy tapsyrdy.