AHQO úzdiksiz bilim berý bıýrosy 2000-nan astam qarjyger mamandy qaıta daıarlady
Osy jáne basqa da ózekti máseleler AHQO-da bıznesti júrgizý sharttary men ınvestıtsııalaýdyń negizderine qatysty ótken Halyqaralyq ınvestorlar aptalyǵy aıasynda talqylandy, dep habarlaıdy QazAqparat tilshisi.
Búgin Qaraǵandyda «Astana» halyqaralyq qarjy ortalyǵy (AHQO), memlekettik organdar, sondaı-aq Qaraǵandy oblysynyń iskerlik jáne akademııalyq toptary ókilderiniń qatysýymen «AHQO ınvestorlarynyń halyqaralyq aptalyǵy» ótti.
Halyqaralyq ınvestorlar aptalyǵy jyl saıyn álemniń 80 elinde baǵaly qaǵazdar jónindegi komıssııasy halyqaralyq uıymynyń (IOSCO) qamqorlyǵymen ótkiziledi. Qazaqstandyq is-sharanyń seriktesi - AHQO.
Іs - sharanyń maqsaty – qarjylyq qyzmetterdiń tutynýshylaryn qorǵaý máselelerinen halyqty barynsha habardar etý, ınvestıtsııalaýdyń negizderi men AHQO-da bıznesti júrgizý sharttary týraly aqparattandyrý bolyp tabylady.
Halyqaralyq ınvestorlar aptalyǵyn ótkizý AHQO-nyń qarjylyq qyzmetterdi tutynýshylardy qorǵaý boıynsha IOSCO standartyna beıimdiligin kórsetedi.
«AHQO-nyń halyqaralyq ınvestorlar aptalyǵy» baǵdarlamasy Qazaqstannyń 6 qalasyn, onyń ishinde Qaraǵandy qalasyn da qamtydy.
«AHQO ınvestorlarynyń halyqaralyq aptalyǵy» akademııalyq jáne isker toptar úshin prezentatsııalar men aqparattyq sessııalar formatynda ótedi.
Kúnniń birinshi jartysynda jastar men akademııalyq toptardyń qarjylyq jáne ınvestıtsııalyq mádenıetin qalyptastyrý jáne ınvestıtsııalaý negizderi týraly aqparattandyrý maqsatynda aımaqtyq joǵary oqý oryndarynyń stýdentteri men professor-oqytýshylar quramy úshin dárister ótti.
«Elimizde qarjy salasynda qazirgi zamanǵy qajetti bilimi bar mamandar tapshylyǵy baıqalady. Biz akademııalyq toptarmen kezdesýlerde olarǵa ózderiniń bilimderi men kúsh-jigerin halyqaralyq qarjylyq sertıfıkattaýǵa beıimdeýge tyrysý kerektigin aıtyp jetkizgimiz keledi. Sebebi álemde joǵary bilim emes, odan da kóp sertıfıkat qajet. Biz dekandar men rektorlarǵa qarjy fakýltetterindegi sońǵy kýrs osy stýdentterdi sertıfıkattarǵa test tapsyrýǵa daıyndaýǵa arnaý kerektigin aıttyq. Al bul óte qıyn testileý», - dedi AHQO Ákimshiliginiń Basqarýshy dırektory Aıdar Qazybaev.
Qazirgi zamanǵy qarjy salasynda kadrlar tapshylyǵyn qysqartý úshin AHQO-da mamandardy qaıta daıarlaý jónindegi bıýro jumys isteıdi. Osy kezde olar 2000-nan astam adamdy qaıta daıarlady.
Aıta ketý kerek, bastama aıasynda memlekettik qyzmetshiler – Qazaqstan Respýblıkasy Prezıdentiniń janyndaǵy Memlekettik basqarý akademııasynyń tyńdaýshylary úshin de semınarlar ótedi.
