AHQO ókilderi shymkenttik jastarmen kezdesti
Jıynǵa qatysýshylarǵa AHQO negizgi strategııalyq baǵyttary, maqsaty, aımaqta kapıtal naryǵyn damytý, aktıvterdi basqarý sııaqty qarjylyq keńester berildi. Ortalyqtyń aǵylshyn quqyǵy prıntsıpterine saı jumys isteıtin TMD-daǵy jalǵyz qarjy ortalyǵy ekeni aıtyldy. IOSCO qundy qaǵazdar jónindegi halyqaralyq komıssııa uıymynyń qoldaýymen uıymdastyrylǵan sharada memlekettiń ekonomıkalyq protsesterine jastardy tartý, óńirlik joǵary oqý oryndar stýdentteriniń qarjylyq jáne ınvestıtsııalyq saýattylyǵyn qalyptastyrý maqsatyn kózdeıtin dárister ótkizilýde.
«Búgin biz stýdentterge jalpy Halyqaralyq qarjy ortalyǵynyń qyzmeti jáne onyń qalaı jumys isteıtindigi jóninde aqpar beremiz. Ortalyqtyń qalaı jumys isteıtindigin jáne onda qandaı múmkindikterdi paıdalanýǵa bolatynyn, stýdentter úshin de oqý barysynda qandaı baǵdar alýǵa, qalaı júzege asyrýǵa, qalaı halyqaralyq qarjy ortalyǵyna kelýge múmkindik bolatynyn túsindirmekpiz. Qazirgi ýaqytta halyqaralyq qarjy ortalyǵy bul platforma sanalady. Bul platformada arnaıy zań, quqyqtyq júıe belgilengen. Konstıtýtsııalyq zańmen belgilengen. Al, quqyqtyq júıeni jasaýdyń maqsaty - ınvestorlarǵa, bolashaqta Qazaqstanǵa keletin kompanııalarǵa túsinikti, ózderi biletin aǵylshyn quqyqtyq júıesiniń qurylǵanyn jetkizý bolyp otyr. Eń basty maqsat - halyqaralyq standarttardy Qazaqstanǵa alyp kelý. Búgin sondaı-aq, shymkenttik kompanııa basshylarymen osy baǵytta jekeleı kezdesip, sóılesetin bolamyz. Olarǵa túsindirýge múmkindik týyp otyr», - deıdi Astana halyqaralyq qarjy ortalyǵy Zań departamentiniń dırektory Nurjan Qosbaev.
Shara spıkerleri retinde AHQO-nyń qarjy qyzmetterin retteý, qarjy tehnologııalary, ıslamdyq jáne jasyl oblıgatsııalardy shyǵarý, baǵaly qaǵazdar naryǵyna ınvestıtsııa tartý salasyndaǵy mamandary qatysty.
«Elbasy Nursultan Nazarbaev qarjy ortalyǵynyń qurylýy halyqaralyq bıznes qoǵamdastyǵynyń Qazaqstanǵa degen seniminiń jáne tabysty damý jolyndaǵy bergen joǵary baǵasynyń belgisi sanalatynyn aıtqan bolatyn. Ortalyqtyń aǵylshyn quqyǵy prıntsıpterine saı jumys isteýi de álemdik naryqqa úlken jol ashady. Óıtkeni osy quqyqtarmen álemdegi kóptegen elder ekonomıkalyq qarym-qatynastaryn retteıdi. Bul Eýropa elderi nemese Eýrazııalyq ekonomıkalyq odaq aıasyndaǵy memleketter de bolýy múmkin. Daýlar saýda-sattyq pen ekonomıkalyq baǵyttaǵy barlyq salalarda kezdesýi múmkin. Máselen, kólik, munaı sııaqty túrli salalarda oryn alyp jatady. Osyndaı jaǵdaıda bıznes ókilderi daýlardy Halyqaralyq qarjy ortalyǵynyń sotyna nemese Tórelik sotqa júgine alady»,- deıdi AHQO ákimshiliginiń sarapshysy Sheıh Bılal Han.
