AHQO Londondaǵy ınvestıtsııalyq forýmnan ne utty
Forýmǵa kimder qatysty jáne onda qandaı máseleler qaraldy?
Ulybrıtanııa astanasy Londonda ótken forýmǵa bas-aıaǵy 150-den astam bıznes ókilderi qatysqan. Olardyń qatarynda aýyl sharýashylyǵy, taý-ken ónerkásibi, óńdeý salasy, hımııa jáne qarjy sektory, metallýrgııa, balamaly energetıka men logıstıka, tsıfrlyq tehnologııalar salasyndaǵy túrli mekeme ókilderi boldy. Sonymen birge, forýmǵa London qor bırjasy, Mitsubishi UFJ Financial Group, JP Morgan Bank, Deutsche Bank, Morgan Stanley, Ernst & Young LLP, PricewaterhousCoopers syndy álemdik birqatar halyqaralyq korporatsııalardyń da ókilderi qatysqan.
Qazaqstan delegatsııasyn premer-mınıstrdiń orynbasary Asqar Jumaǵalıev bastap barǵan. Aıtýly sharada AHQO qyzmeti, Qazaqstandaǵy jekeshelendirý protsesteri, ekonomıkanyń túrli salalaryna ınvestıtsııa tartý, Uly Jibek jolyn jańǵyrtý, kólik logıstıkasyn damytý, tsıfrlandyrý salasyndaǵy tyń jańalyqtar syndy keleli máseleler talqylandy.
Qazaqstandyq delegatsııa forýmda qandaı taqyryptardy tilge tıek etti?
Asqar Jumaǵalıev bastaǵan qazaqstandyq delegatsııa forým barysynda sheteldikterge elimizdiń ınvestıtsııalyq múmkindikterin tanystyrdy. «Ulybrıtanııa - Qazaqstan ekonomıkasyna ınvestıtsııa quıǵan eń iri ınvestorlardyń biri. Qazaqstan tarıhynda elge ákelingen 300 mlrd AQSh dollary ınvestıtsııasynyń 13 mıllıardy brıtandyqtarǵa tıesili. Qazaqstan tarapy Ulybrıtanııany qashan da strategııalyq áriptesi retinde kóredi. Elimiz árdaıym ekonomıkany ártaraptandyrýǵa múddeli jáne biz osy oraıda, kapıtal, ozyq tehnologııalar men teńdessiz tájirıbe ákeletin brıtandyq ınvestorlardy osy jumysqa tartýǵa nıettimiz», - dedi Asqar Jumaǵalıev.
AHQO basshysy Qaırat Kelimbetov bolsa, óńirlik qarjylyq hab - ınvestorlar úshin taptyrmaıtyn múmkindik ekenin atap ótti. «AHQO óz qatysýshylary úshin 50 jylǵa arnalǵan, jeńildetilgen salyq rejımin usynady. Buǵan qosa ol ınvestorlar arasyndaǵy daýdy aǵylshyndyq quqyq negizinde sheshýge tyrysady. Munyń bári AHQO óńirdegi qarjylyq habqa aınaldyrady degen senimdemiz. Sondyqtan sizderdiń bıznesterińizdi damytý úshin, AHQO taptyrmaıtyn alań bolyp otyr»,-dedi AHQO basshysy.
Jıyn barysynda, Ulybrıtanııanyń Qazaqstandaǵy saýda elshisi Baronessa Emma Nıkolson, Eýropalyq qaıta qurý jáne damý bankiniń (EQQDB) tóraǵasy Sýma Chakrobartı, EQQDB-niń Qazaqstandaǵy dırektory Agrıs Preımanıs jáne t.b. sóz alǵan.
Forým aıasynda qandaı kelisimderge qol jetkizildi?
Aıtýly shara sheńberinde, qos tarap túrli kelisimderge qol jetkizdi. Dálirek aıtsaq, EQQDB jáne «Samruq-Qazyna» UÁQ arasynda «ShalkııaTsınk LTD» AQ nesıelik kelisimge kepildik berý týraly kelisimge qol qoıyldy. Sonymen birge, «Danaher» kompanııasy densaýlyq saqtaý mekemelerin salýǵa qatysty memlekettik-jekemenshik áriptestik jobalaryna qatysýǵa qyzyǵýshylyq tanytqan. Sol sııaqty, «Hinduja Group» jáne «Rio Tinto» kompanııalary Qazaqstanmen birlese jumys jasaýǵa nıetti ekendikterin jetkizgen.
Sandar sóıleıdi:
Jalpy tumandy Albıon eli Qazaqstannyń saýda seriktestikteri boıynsha úzdik ondyqqa jáne iri 6 ınvestordyń qataryna kiredi. Aıta keterligi, Qazaqstan men Anglııa arasyndaǵy saýda aınalymy 2017 jyly 1,5 paıyzǵa ósip, 1,28 mıllıard AQSh dollaryn quraǵan. Al, eksport kólemi 926,7 mıllıon teńgege jetken. Bıylǵy jyldyń alǵashqy toqsanynda ózara saýda-sattyqtyń jalpy aınalymy 252,6 mıllıon AQSh dollaryn qurap, eksport - 158,8 AQSh dollar, ımport - 93,8 mıllıon AQSh dollarynan asqan.
Qoryta aıtqanda...
Eske salar jaıt, dál osyndaı forým AQSh-tyń Nıý-Iork qalasynda da ótken edi. Oǵan atalmysh delegatsııa ókilderi qatysyp, AQSh tarapyna elimizdiń ınvestıtsııadyq múmkindikteri tanystyrǵan edi. Artynsha, shara aıaqtalysymen, Asqar Jumaǵalıev Elbasy aldynda onyń nátıjelerine qatysty esep berip, memleket basshysy Premer-mınıstrdiń orynbasaryna birqatar tapsyrmalar bergen edi. Bastysy alyp AQSh pen tumandy Albıon eline AHQO-da bıznes júrgizýdiń múmkindikteri tanystyrylyp, shetel azamattary óńirlik qarjylyq habtyń tynys-tirshiligimen tanysty. Bul óz kezeginde, aldaǵy ýaqytta AHQO qatysýshylary arasynda amerıkalyq jáne brıtandyq iri kompanııalardyń qatarynyń kóbeıýine óz septigin tıgizetini anyq.
Foto: primeminister.kz
