AHQO Qarjylyq qyzmetterdi retteý komıteti CBIRC-pen memorandým jasasty
Qujatqa qol qoıý rásimi CBIRC delegatsııasynyń Astana Halyqaralyq qarjy ortalyǵyna resmı sapary aıasynda ótti. Oǵan CBIRC Tóraǵasy Gýo Shýkıng, AHQO Basqarýshy dırektory Qaırat Kelimbetov jáne Qarjylyq qyzmetterdi retteý komıteti (AFSA) bas dırektorynyń mindetin atqarýshy Muhtar Bóbeev qol qoıdy.
Taraptar eki jaqtyń quzyretindegi transshekaralyq banktik jáne saqtandyrý boıynsha ınstıtýttardy qadaǵalaýda yntymaqtastyqty damytýǵa jáne CBIRC pen AFSA arasyndaǵy tıisti aqparat almasýdy damytýǵa ýaǵdalasty.
«CBIRC jáne AFSA arasyndaǵy memorandýmǵa qol qoıý Qytaı men Qazaqstan arasyndaǵy retteýshilik yntymaqtastyqty nyǵaıtýǵa qosymsha negiz bolyp tabylady, bul bank qyzmetteri men saqtandyrý salasyndaǵy ekijaqty yntymaqtastyqty damytýǵa, ekijaqty ekonomıkalyq-saýda qatynastaryna qoldaý bildirýge múmkindik beredi», - dedi CBIRC Tóraǵasy Gýo Shýkıng.
Óz kezeginde Qaırat Kelimbetov qol qoıylǵan memorandýmnyń mańyzdylyǵyn atap ótti.
«Qytaıdyń banktik jáne saqtandyrý qyzmetin retteý komıssııasy men AHQO qarjylyq qyzmetterdi retteý komıtetiniń yntymaqtastyq ornatýyn quptaımyn. Retteýshiler arasyndaǵy tıimdi ózara yqpaldastyq «Bir beldeý, bir jol» bastamasy aıasynda Qazaqstan-Qytaı yntymaqtastyǵyn damytýǵa yqpal etedi», - dedi ol.
Aıta keterligi, Qarjylyq qyzmetterdi retteý komıteti (AFSA) - AHQO-nyń táýelsiz retteýshisi jáne zańdy tulǵa bolyp sanalady. AHQO erejeleri qarjy kompanııalaryn jáne naryqtyq mekemelerdi lıtsenzııalaý, tirkeý, akkredıtteý jáne qadaǵalaýdy qarastyrady.
CBIRC - Qytaı Halyq Respýblıkasynyń Memlekettik Keńesine tikeleı baǵynatyn memlekettik mekeme. Ol QHR Kommertsııalyq bankter týraly zańyna jáne QHR kompanııalar týraly zańyna sáıkes saqtandyrý, depozıtter qabyldaý, qaryz berý jáne basqa da is-sharalardy uıymdastyratyn qarjy ınstıtýttaryn retteý men qadaǵalaýǵa jaýapty.
