AHQO Halyqaralyq ınvestorlar aptalyǵyn ótkizbek
Jahandyq bastama Baǵaly qaǵazdar jónindegi komıssııalardyń halyqaralyq uıymy (IOSCO) aıasynda onlaın formatta ótkiziledi.
IOSCO - baǵaly qaǵazdardyń álemdik retteýshilerin biriktiretin halyqaralyq uıym. AHQO-daǵy Halyqaralyq ınvestorlar aptalyǵy taqyryptyq turǵyda ınvestıtsııalaýdyń, aqyldy ınvestıtsııalaýdyń, tsıfrlyq aktıvterdiń, ornyqty qarjylandyrýdyń, alaıaqtyqtyń aldyn alýdyń, qarjylyq saýattylyq pen bilimniń negizderin túsinýge baǵyttalady.
IOSCO basqarma tóraǵasy jáne Gonkong baǵaly qaǵazdar men fıýcherster jónindegi komıssııasynyń bas atqarýshy dırektory Eshlı Alderdiń aıtýynsha, baǵaly qaǵazdar naryǵynda jeke ınvestorlardyń sany ósip jatqan kezeńde WIW-tiń aqparattandyrý bastamalary erekshe mańyzdy. Sebebi, koronakrızıs kezeńinde kóptegen adamdar qosymsha kiris kózderin tabýdy izdeýmen bolsa, osy jaǵdaıdyń saldarynan alaıaqtyqpen aınalysatyn qylmyskerlerdiń de sany ulǵaıa tústi.
Baǵaly qaǵazdardy retteýdiń álemdik úlgisin ornatqan bul uıymnyń WIW bastamasy ıýrısdıktsııalar, múddeli taraptar men iri halyqaralyq uıymdar arasynda kúnnen-kúnge qoldaýǵa ıe bolyp keledi. Onyń ishinde, ekonomıkalyq kartada álemniń biregeı ortalyǵy bolyp tabylatyn AHQO da óz WIW bastamasynda IOSCO-nyń joldaýlaryn barynsha taratýǵa qoldaý kórsetip keledi.
«Jalpy aıtqanda, IOSCO aıasynda ótkizilip jatqan WIW bastamasynyń túbegeıli maqsaty - jeke ınvestorlardy qorǵaý, ıaǵnı alaıaqtyqtan qorǵaný joldary týraly aqparattandyrý. Investıtsııa salmastan buryn, osy salanyń negizgi uǵymdarymen tanysyp, onyń qalaı jumys isteıtinin túsiný qajet. Mysaly, áleýmettik jelidegi blogerlerdiń, ne basqa da tanymal adamdardyń sózine ere bermeı, karjy salasynda óz saýatymyzdy ashýdy alǵa qoıýymyz kerek», - dep málimdedi AFSA Halyqaralyq qatynastar jáne kommýnıkatsııa departamentiniń dırektory Almas Jolamanov.
Osyǵan oraı, qarjylyq erkindik jolynda alaıaqtyqtan qorǵaný úshin ne isteý kerektigi týraly, ári qarjy salasyndaǵy basqa da qundy aqparat jaıynda Halyqaralyq ınvestorlar aptalyǵynda álemniń jetekshi sarapshylary jıǵan-tergen bilimimen bólispek. Onyń ishinde, AQSh-tyń Baǵaly qaǵazdar men bırjalar jónindegi komıssııasynyń ınvestıtsııalyq bilim berý jónindegi zań keńesshisi Oýen Donlı, Qarjylyq josparlaý standarttary keńesiniń qarjylyq kásipqoılyq jónindegi dırektory Pol Graıms, AHQO Qarjylyq qyzmetterdi retteý jónindegi komıtetiniń bas dırektory Muhtar Bóbeev jáne Baǵaly qaǵazdar jónindegi komıssııalardyń halyqaralyq uıymynyń Jeke ınvestorlar komıtetiniń tóraǵasy Paskal Mýnofo negizgi spıkerler retinde qatysady.
Eger siz ınvestıtsııa jasaýǵa qyzyǵýshylyq tanytyp nemese jalpy qarjy salasynda saýatyńyzdy ashýǵa yntalanyp júrgen bolsańyz, osy silteme boıynsha Halyqaralyq ınvestorlar aptalyǵyna tirkelseńiz bolady. AHQO-da Halyqaralyq ınvestorlar aptalyǵy týraly tolyǵyraq aqparat myna silteme arqyly qol-jetimdi.
