AHQO bırjasynyń saýda-sattyq qyzmetine sholý jasaldy

ASTANA. QazAqparat - «Astana» halyqaralyq qarjy ortalyǵynyń bırjasy (AHQO bırjasy, AIX) 2019 jyldyń 3 qańtarynan 11-ine deıingi kezeńindegi saýda-sattyq qyzmetine sholý jasady, dep habarlaıdy QazAqparat.

«Atalǵan ýaqytta «Qazatomónerkásip» UAK» AQ-nyń («Qazatomónerkásip», «KAP») qarapaıym aktsııalary boıynsha aınalym 391,6 mln teńgeni (278 mámile, 77 019 aktsııa) qurady. Osy kezeńde «Qazatomónerkásiptiń» jahandyq depozıtarlyq qolhattarymen (JDQ) 72,4 myń AQSh dollary somasyna (5 310 JDQ) 8 mámile jasaldy», - delingen AHQO baspasóz qyzmetiniń málimetinde.

Budan bólek, 2019 jylǵy 8 qańtarda «Atyraý MÓZ» JShS oblıgatsııalary AIX baǵaly qaǵazdar resmı tizimine «jeke ornalastyrý» sanatynda qosyldy.

Sonymen qatar, «First Heartland Securities» AQ jáne «Fincraft Investments House» AQ AIX saýda múshesi jáne AIX CSD (AIX ortalyq depozıtarııi») qatysýshysy mártebesine ıe boldy.

Aıta keteıik, AIX. AHQO Bırjasy 2018 jyly «Astana» halyqaralyq qarjy ortalyǵyn damytý aıasynda quryldy. 2018 jylǵy 14 qarashada QR Prezıdenti Nursultan Nazarbaev AIX alańynda baǵaly qaǵazdardyń alǵashqy saýda-sattyǵyn iske qosty. AIX aktsıonerleri qatarynda AHQO, GoldmanSachs, Shanhaı qor bırjasy, Jibek joly qory men AIX-ke saýda alańyn usynyp otyrǵan NASDAQ bar. www.aix.kz.

Eske sala ketsek, 2015 jyldyń jeltoqsan aıynda Elbasy «Astana» halyqaralyq qarjy ortalyǵyn (AHQO) qurý týraly Konstıtýtsııalyq Zańǵa qol qoıdy. AHQO maqsaty - halyqaralyq deńgeıdegi jetekshi qarjylyq ortalyq qurý. AHQO-nyń basty mindeti - Qazaqstan Respýblıkasy baǵaly qaǵazdar naryǵyn damytý, halyqaralyq naryq kapıtalyn negizge ala otyryp, baǵaly qaǵazdar naryǵynyń jandandyrylýyn qamtamasyz etý, qarjylyq qyzmetter salasyna tikeleı ınvestıtsııa tartý úshin, qolaıly orta qurý arqyly el ekonomıkasyna ınvestıtsııa tartýǵa jol ashý.