AHQO basshysy Boao azııalyq forýmy aıasyndaǵy paneldik sessııaǵa qatysty

BOAO. QazAqparat – Boao azııalyq forýmy (BAF) aıasynda «Astana» Halyqaralyq qarjy ortalyǵynyń (AHQO) basshysy Renat Bekturov «Bir beldeý, bir jol: Damýdyń ortaq múmkindikterin birge paıdalaný» atty paneldik sessııasyna qatysty, dep habarlaıdy QazAqparattyń menshikti tilshisi.

Paneldik sessııa qatysýshylary elder saýda-ekonomıkalyq baılanystardy nyǵaıtý úshin, ekonomıkany qalpyna keltirý jáne damytý, sondaı-aq tsıfrlyq transformatsııany damytý úshin qandaı is-sharalar uıymdastyrý kerek degen máselelerge toqtaldy. Tómen kómirtekti ekonomıkaǵa kóshý taqyryby da talqylandy.

Renat Bekturovtyń sózinshe, Forým aıasynda Dúnıejúzilik banktiń eks-prezıdenti jáne Mońǵolııa men Pákistan úkimeti ókilderiniń qatysýymen paneldik sessııa ótti.

AHQO basshysy bıyl «Beldeýler men joldar» bastamasyna 10 jyl tolatynyn aıtty. Osy bastama aıasynda Qazaqstanda birqatar iri ınfraqurylym obektileri júzege asty. 10 jyl buryn ekonomıkalyq dálizderdi damytý týraly aıtylǵan bolsa, qazir olardyń biri - «Orta dáliz» Qazaqstannyń tranzıttik jáne saýda haby atanýy úshin asa mańyzdy.

«Bul bizdiń saýda baǵyttarymyzdyń dıversıfıkatsııasy jáne jalpy alǵanda, turaqtylyq turǵysynan mańyzdy», - dep atap ótti Renat Bekturov.

«Astana» Halyqaralyq qarjy ortalyǵynyń (AHQO) quzyretinde álemniń 70-ten astam eliniń 2 myńǵa jýyq kompanııasy tirkelgen.

Rýslan Súleımenov