Aǵza donory bolý nemese odan bas tartý ótinishi qalaı rásimdeledi

ASTANA. QazAqparat – Qaıtys bolǵannan keıin donor retinde aǵzalaryn berýge kelisetini nemese odan bas tartatyny týraly ótinishti qazaqstandyqtar kózi tiri kezinde elektrondy túrde rásimdeı alady, dep habarlaıdy QazAqparat tilshisi.

Densaýlyq saqtaý mınıstrliginiń málimetine sáıkes, kóz jumǵannan keıin transplantatsııa maqsatynda aǵzalaryn alýǵa ruqsat berý «Halyq densaýlyǵy jáne densaýlyq saqtaý júıesi týraly» QR Kodeksiniń 209-babynyń 8-tarmaǵyna sáıkes júzege asyrylady.

«Nıet bildirgen azamattar ótinishti tirkelgen emhanasy arqyly nemese «Elektrondy úkimet» veb-portaly kómegimen rásimdeı alady», - delingen mınıstrlik habarlamasynda.

Ol úshin:

- Egov.kz» júıesine elektrondy tsıfrlyq qoltańba nemese birrettik kiltsóz arqyly kirý;

- «Densaýlyq saqtaý» bóliminen «Transplantatsııa maqsatynda qaıtys bolǵannan keıin erikti aǵza donorlyǵyna kózi tirisinde kelisimdi tirkeý nemese kelisimdi qaıtaryp alý (ıaǵnı bas tartý)» qyzmetin tańdaý;

- ótinish túrin tańdaý: «kelisimdi qaıtaryp alýdy tirkeý (bas tartý)» nemese «kelisimdi tirkeý».

Vedomostvo aqparatyna saı, eger azamattar ótinishti tikeleı emhanaǵa baryp rásimdeıtin bolsa, onda jaýapty tulǵa áýeli jeke basty jáne tirkeý mártebesin kýálandyratyn qujattardy tekseredi. Keıin qaıtys bolǵannan soń aǵza donory bolýǵa kelisim beretinin nemese odan bas tartatyn sheshimin arnaıy úlgi boıynsha toltyrady.

«Toltyrylǵan úlgi tirkeledi. Al sizge birinshi basshynyń qoly qoıylǵan jáne medıtsınalyq-sanıtarlyq alǵashqy kómek uıymynyń mórimen bekitilgen tirkeý anyqtamasy beriledi. Qazaqstan Respýblıkasynyń azamattaryna aǵzalardy transplanttaý tegin júzege asyrylady», - dep málim etti vedomstvodan.

Qosa ketsek, elimizde aǵza transplantatsııasyn qajet etetin 3 562 naýqas kezekte tur. Onyń ishinde 77 bala bar.