Aǵza almastyrý otasyn kútip júrgen 4099 qazaqstandyqty qoldaýǵa 4200 adam jınaldy
ASTANA. KAZINFORM – 2012 jyldyń 8 tamyzynda Qazaqstanda alǵash ret júrek almastyrý otasy sátti ótken bolatyn. Búgin Astanada osy aıtýly datanyń qurmetine oraı dástúrli qaıyrymdylyq jarys ótti.
«Júregimniń jeńimpazy». Aǵza almastyrý medıtsınasynyń keleshegine beıjaı qaramaıtyn astanalyqtardyń basyn jarys jolynda qosqan sharanyń ataýy bul. Tańǵy saǵat 6.00-ge josparlanǵan sharaǵa jeksenbiniń tátti uıqysyn qıyp kelgenderdiń sany tórt myńnan asty.
Transplantatsııa máselesine qoǵam nazaryn aýdarý úshin uıymdastyrylǵan sharaǵa Heart Center Foundation qoǵamdyq qory muryndyq bolyp otyr. Bul uıym eldegi densaýlyq saqtaý salasynda qurylǵan alǵashqy endaýment-qor bolyp esepteledi. Aty aıtyp turǵandaı, júrektiń túrli dertimen kúreske baǵyttalǵan jobalardy qoldaýmen aınalysady.
Jarysqa qatysýshylardyń ishinde transplantatsııanyń arqasynda ómirin uzartyp, densaýlyǵyn ońaltqan keshegi naýqastarda, «kezegin» kútip júrgen muqtajdar da, medıtsına mamandary men aǵza donorlyǵynyń mánin túsinetin qarapaıym turǵyndar da boldy. Jarys qorytyndysy boıynsha márege jetken qatysýshynyń bárine jeńimpaz medali berildi.
EKSPO qalashyǵyndaǵy «Nur Álem» sferasynyń aınalasyna jınalǵan 4 myńnan astam adam kontsert tamashalap, túrli jármeńkege qatysty.
Heart Center Foundation qoǵamdyq qorynyń dırektory Murat Zaýrovtyń sózinshe, is-sharadan túsken qarajattyń bári Transplanttaýdy jáne joǵary tehnologııalyq medıtsınalyq qyzmetti úılestirý jónindegi respýblıkalyq ortalyǵy bekitken memorandým aıasynda iske asatyn jobalardy qarjylandyrýǵa baǵyttalady.
«Ókinishke qaraı, aǵza almastyrý máselesi jaıynda qajetti aqparatty biletin adamdardyń sany az. Kóbi onyń qanshalyqty mańyzdy ekenin óz basyna nemese jaqyndaryna túskenshe oılanyp jatpaıdy. Bizdiń jyl saıyn osyndaı shara ótkizip júrgendegi maqsatymyz – eldiń nazaryn máselege kóbirek aýdarý. 2024 jylǵy mamyrdaǵy jaǵdaı boıynsha elimizde 4099 adam aǵza almastyrý paraǵynda tur. Onyń ishinde 144 adam júrek almastyrý otasyn kútip júr. 2012 jyldan beri Qazaqstanda 97 júrek transplantatsııasy jasalǵan. Osydan-aq aǵza donorlyǵyna qoǵamnyń qanshalyqty beıjaı qaraıtynyn kórýge bolady. Alǵash osy festıvaldi qolǵa alǵan kezde 30 shaqty adam ǵana kelgen shyǵar. Jyl saıyn qatarymyz artyp keledi. Byltyr 500 adam qatyssa, bıyl 4200 adam kelip otyr. ıAǵnı, eldiń nazary tam-tumdap bolsa da, bul máselege aýyp keledi», - deıdi ol.
Transplanttaý qyzmetin úılestirý jónindegi respýblıkalyq ortalyqtyń deregine súıensek, 10 mamyrdaǵy jaǵdaı boıynsha elde 4099 adam aǵza almastyrý otasyn kútý paraǵynda tur.
Búırek almastyrý paraǵynda: 3660 eresek, 85 bala.
Baýyr almastyrý paraǵynda: 180 eresek, 10 bala.
Ókpe almastyrý paraǵynda: eresekter – 15 eresek.
Júrek almastyrý paraǵynda: 138 eresek, 6 bala.
«Júrek-ókpe» kesheni paraǵynda: 2 eresek, 3 bala.
