Agrotehnıkany lızıngke berý, paıyzyn sýbsıdııalaý qaıta jandanady - Shókeev
Aqtóbe oblysyna eki kúndik jumys saparymen kelgen Ómirzaq Shókeev keshe taýarly sút fermasy men jylyjaıǵa bardy. Al búgin aýyl sharýashylyǵyn damytýǵa úles qosyp júrgen sharýalarmen kezdesti. Elimizdiń ár óńirinen kelgen sharýalar salany damytý úshin sýbsıdııa bólý, mamandardy daıyndaý usynystaryn jetkizdi.
«Aýyl sharýashylyǵynyń ónimdiligin arttyrý aldymen tehnıkaǵa táýeldi. Tehnıkany jańartý dınamıkasyna qarasaq, sońǵy jyly ósim báseńdegen. Qazirgi kezde jańartý 2 paıyzǵa tómendedi. Sondyqtan aýyl sharýashylyǵy tehnıkasyn jańartý baǵdarlamasyn qaıta qalpyna keltirip, paıyzdyq ústemeaqyny sýbsıdııalaý, lızıng berý, ınvestıtsııalyq sýbsıdııa sekildi qoldaýlardy qaıta qalpyna keltiremiz. Osy maqsatta ishki rezervter tabylady»,- dedi mınıstri Ómirzaq Shókeev.
Aýyl sharýashylyǵyn damytýdyń bir joly - tuqym sapasyn arttyrý. Sapasyz tuqymnan shyǵyn kóp bolady. Tipti, sapasyz tuqymnan elimizdegi astyqtyń 20 paıyzy jaramsyz kúıge túsip jatady. Elimizde 214 tuqym sharýashylyǵy bar bolsa, olar suranystyń tek 21 paıyzyn qamtamasyz ete alady. Olardyń kóbi áli de eski ádispen jumys istep, memlekettiń kómegine jıi júginedi.
«2016 jyly shetelden tuqym tasýǵa ruqsat berildi. Kóp sharýashylyq bul múmkindikti bilmeıdi. Sondyqtan túsindirý jumystaryn júrgizýimiz qajet. Al Qazaqstandaǵy tuqym sharýashylyǵyn damytyp otyrǵan kásipkerler ashyq básekege daıyn bolýy kerek. Ári olar Qazaqstandaǵy tuqym sharýashylyǵy palatasyn qurýy shart. Mınıstrlik pen sheneýnikter emes, máseleni palata sheshkeni durys»,- dedi Premer orynbasary-aýyl sharýashylyǵy mınıstri.
Ol sondaı-aq qarjy ınstıtýttarynyń jumysyna toqtaldy. Sońǵy jyldary elimizde aýyl sharýashylyǵyn nesıelendirý 25 paıyzǵa tómendegen. Al paıyzdyq ústemeaqy 18 paıyzǵa jetken. Ómirzaq Shókeevtiń aıtýynsha, paıyzdyq ústemeaqyny sýbsıdııalaý jańartylyp, nesıe ústemeaqysy 10 paıyzdan joǵary bolmaýy qadaǵalanady.
Jıyn barysynda aýyl sharýashylyǵynda eksporttyq áleýetti arttyrý máselesi de qozǵaldy.
«Biz etti óńdeý arqyly eksporttyq áleýetimizdi arttyra alamyz. Birinshiden, jerimiz keń. Eshbir el jer kólemi jaǵynan bizdeı maqtana almaıdy. Ekinshiden, mal baǵý bizdiń dástúrimizde bar. Biz mal baǵa alamyz. Máselen, keıbir elder iri qara satyp alyp, ony baǵatyn adamdy da qosa alady eken. Bizde ondaı problema joq. Úshinshiden, biz Ońtústik Amerıka men Jańa Zellandııaǵa shyǵara alamyz. Bul bizdiń múmkindigimiz. Etti óńdep, ony Qytaı men Reseıge jáne ózge elge shyǵarý qajet»,- dedi Ómirzaq Shókeev.
Aıta keteıik, shetelden iri qara satyp alý baǵdarlamasy 2013 jyly tanystyrylyp, zań qabyldandy. Sodan beri 67 myń bas asyl tuqymdy iri qara ákelindi. Qazirgi kezde elimizde asyl tuqymdy iri qara 450 myńǵa jetti.