Agrarlyq ǵylym ekonomıkaǵa qyzmet etýi tıis - AShM
ASTANA. KAZINFORM – Aýyl sharýashylyǵy mınıstri Aıdarbek Saparovtyń tóraǵalyǵymen agrarlyq ǵylymdy damytý jáne ǵylymı uıymdardyń tıimdiligin arttyrý máseleleri boıynsha keńes ótti.
Jıynǵa Ulttyq agrarlyq ǵylymı-bilim berý ortalyǵy (UAǴBO), onyń enshiles uıymdary, ǵylymı-zertteý ınstıtýttary, salalyq departamentter jáne ǵylymı qaýymdastyq ókilderi qatysty.
Mınıstr óz sózinde Memleket basshysynyń 2023 jylǵy Joldaýynda agrarlyq ǵylymdy damytý jáne ǵylymı nátıjelerdi óndiriske engizý boıynsha júıeli sharalar qabyldaý tapsyrylǵanyn eske saldy.
– UAǴBO-ny tolyq óndiristik tizbekti qamtıtyn agrotehnologııalyq habqa aınaldyrý jóninde strategııalyq mindet qoıyldy. Belgili bir jumystar atqarylǵanymen, ázirge júıeli nátıje baıqalmaıdy. Agrarlyq ǵylymnyń damýyn tejep otyrǵan faktorlardy ashyq talqylap, naqty sheshim qabyldaý qajet, – dedi Aıdarbek Saparov.
Aýyl sharýashylyǵy vıtse-mınıstri Erbol Tasjúrekov qabyldanyp jatqan sharalar týraly baıandady. Onyń aıtýynsha, 2024–2026 jyldarǵa arnalǵan baǵdarlamalyq-nysanaly qarjylandyrý aıasynda 34 ǵylymı-tehnıkalyq baǵdarlama iske asyrylǵan. Sonyń ishinde 26 baǵdarlama UAǴBO enshiles uıymdary arqyly júzege asyrylýda.
Selektsııa jáne tuqym sharýashylyǵyn damytý sheńberinde 2028 jylǵa deıingi Keshendi jospar bekitilgen. Baǵdarlamalardy oryndaý nátıjesinde memlekettik sort synaǵyna 108 jańa sort pen býdandy usyný josparlanyp otyr. Mınıstr olardyń naryqtaǵy suranysy men ekonomıkalyq tıimdiligin naqty baǵalaý qajettigin atap ótti.
Tuqym sharýashylyǵy salasyndaǵy memlekettik baqylaý máseleleri de talqylandy. AÓK-tegi memlekettik ınspektsııa komıteti quramynda tuqym óndirisi, sertıfıkattaý jáne ótkizý úderisterine júıeli qadaǵalaý júrgizetin beıindi basqarma quryldy. Bul sýbsıdııalaý rásimderiniń ashyqtyǵyn arttyrýǵa baǵyttalǵan.
UAǴBO basqarma tóraǵasy Baýyrjan Asanov 2026 jyly 110,5 myń gektar alqapqa egis júrgizý josparlanǵanyn aıtty. Ásirese maıly jáne mal azyqtyq daqyldardyń úlesi artady. Tuqymdyq egis alqaptary 66,8 myń gektarǵa deıin ulǵaıyp, jalpy egis kóleminiń 60%-yn quraıdy.
2026–2030 jyldarǵa arnalǵan mal sharýashylyǵyn damytý jónindegi Keshendi jospar aıasynda UAǴBO enshiles uıymdary men beıindi oqý oryndary bazasynda 17 quzyret ortalyǵy qurylmaq.
Keńes barysynda ǵylymı ázirlemelerdi kommertsııalandyrýdy kúsheıtý, kadrlyq áleýetti nyǵaıtý, materıaldyq-tehnıkalyq bazany jańartý jáne ǵylym men agrobıznes arasyndaǵy baılanysty arttyrý máseleleri kóterildi.
Qorytyndylaı kele, Aıdarbek Saparov agrarlyq ǵylym naqty ekonomıkalyq nátıje berýi tıis ekenin basa aıtty.
– Árbir ǵylymı-tehnıkalyq baǵdarlama salanyń naqty tabysyna jumys isteýi kerek. Mindetterdi oryndaý barysynda kózboıaýshylyqqa jol berilmeıdi. Agrarlyq ǵylymǵa qatysty barlyq másele meniń tikeleı baqylaýymda bolady, – dedi mınıstr.
Keńes qorytyndysy boıynsha salalyq departamentter men UAǴBO-ǵa Keshendi josparlar sheńberindegi is-sharalardy sapaly iske asyrý, kóktemgi dala jumystaryna ýaqytyly daıyndyqty bastaý, agrarlyq sala ókilderine usynymdar ázirleý jáne ınvestorlardy tarta otyryp jer resýrstaryn tıimdi paıdalanýdy qamtamasyz etý tapsyryldy.
Aıta keteıik, Úkimet depýtattardyń agrobank qurý týraly usynysyn taǵy qoldamady.