Afrıkanyń 43 memleketi Qazaqstannyń damý modelin úırenýde
Astanada Qazaqstan men Afrıka qurlyǵyndaǵy memleketterdiń ózara tájirıbe almasýy boıynsha sımpozıým ótip jatyr. Shara aıasynda afrıkalyq 43 memlekettiń ókilderi Qazaqstanǵa kelip, ekonomıkalyq órkendeý men damýdyń qazaqstandyq modelin zerttep jatyr.
Sımpozıým barysynda qatysýshylar Shyǵys Eýropa men postkeńestik elderdiń damýyna, sondaı-aq ekonomıkalyq dıversıfıkatsııalar men qurylymdyq tranformatsııa máselelerine erekshe mańyz bergen. Sonymen qatar baǵdarlama sheńberinde Afrıka elderiniń memlekettik qyzmetkerleri Qazaqstannyń negizgi ınnovatsııalyq-ındýstrııalyq kásiporyndaryn aralaýǵa múmkindik alǵan. Atap aıtqanda, meımandar «Tulpar - Talgo» jolaýshylar vagondaryn shyǵaratyn zaýyttyń, kún panelderin óndiretin «Astana Solar» kompanııasynyń, LED shamdar shyǵaratyn «Astana Led» kompanııasynyń jumysymen tanysty.
Afrıkalyq qonaqtar ındýstrııalyq kásiporyndardyń ónimdiligine tańdanysyn jasyrmady. Eń bastysy, atalǵan kásioryndarda shıkizattyń 70 paıyzy jergilikti ónim ekeni olardy tipti qyzyqtyra túsken. Afrıkadan kelgen memlekettik qyzmetkerler kóptegen suraqtaryn qoıyp, qazaqstandyq ónimdi eksporttaýǵa qatysty saýaldaryna jaýap aldy.
«Maǵan vagon óndiretin zaýyttyń jumysy óte unady. Eń qyzyǵy, dál sol zaýytta erlermen tize qosyp, názik jandylardyń da eńbek etip júrgeni qyzyqtyra tústi. Áıelder ákimshilik salada ǵana emes, óndiristik salada da kóp eken», - deıdi Botsvana memleketiniń Innovatsııalar men damý mınıstrliginiń ókili Rozına Bontsı.
