AES salýdy qoldaý jónindegi Halyqtyq shtab mıllıondaǵan qazaqstandyqty biriktirdi
ASTANA. KAZINFORM – Májilis Spıkeri, «AMANAT» partııasynyń tóraǵasy Erlan Qoshanov AES salýdy qoldaý jónindegi Halyqtyq shtabtyń alǵashqy otyrysyn ótkizdi. Onyń quramyna 6 saıası partııanyń, sondaı-aq shamamen 20 respýblıkalyq qoǵamdyq birlestiktiń 250-ge jýyq ókili kirdi.
6 qazanda ótetin AES salý jónindegi referendýmnyń Táýelsiz Qazaqstannyń bolashaǵy úshin strategııalyq mańyzy zor. Sondyqtan elimizdegi bedeldi saıası jáne qoǵamdyq uıymdar AES salýdy qoldaý jónindegi Halyqtyq shtabqa birikti. Bul týraly Májilis Spıkeri, «AMANAT» partııasynyń Tóraǵasy Erlan Qoshanov Shtabtyń alǵashqy otyrysynda málimdedi. Shtabtyń maqsaty – halyqty atom elektr stantsııasyn salý jónindegi progressıvti ıdeıasynyń aınalasynda toptastyrý.
«AES qurylysy – Qazaqstannyń aldaǵy uzaq jyldardaǵy tabysty damýynyń kepili bolatyn serpindi joba. Elimizdegi jáne álemdegi barlyq ozyq oıly tulǵalar atom energetıkasyn paıdalanýdyń tıimdiligin jaqsy túsinedi. Bul – eń aldymen, qaýipsiz, senimdi, ekologııalyq taza joba. Biz úlken tańdaý aldynda turmyz. Sondyqtan Halyqtyq shtabtyń mindeti – el arasynda keń aýqymdy túsindirý jumystaryn júrgizip, qoǵamdy AES-ti qoldaýǵa jumyldyrý. 6 qazanda ótetin referendým bizdiń birligimizdi kórsetedi», – dedi ol.
Májilis Spıkeri búgingi tańda energetıkalyq táýelsizdik máselesi kún tártibinde alǵashqy orynǵa shyqqanyn atap ótti. Álemniń ozyq elderiniń tájirıbesi atom energetıkasynyń tıimdiligi men qaýipsizdigin aıqyn dáleldeıdi. Qazirgi ýaqytta Qazaqstan elektr energııasynyń tapshylyǵyn sezinýde jáne ony kórshi elderden ımporttaýǵa májbúr. Sondyqtan Halyqtyq shtabtyń basty mindeti – qoǵamǵa AES salýdyń mańyzdylyǵy men artyqshylyqtaryn jetkizý, jurt arasyndaǵy negizsiz úreılerdi seıiltý. Oǵan qosa, partııalar men ÚEU-lardyń birlesip jumys isteýde tabysty tájirıbesi de bar.
«Bizdiń árqaısymyz balalarymyzdyń qýatty jáne eshkimge muqtaj bolmaıtyndaı táýelsiz memlekette ómir súrgenin qalaımyz. AES salý týraly sheshimdi qabyldaı otyryp, biz osy asqaq armanymyzǵa qaraı qadam jasaımyz. Biz eldiń energetıkalyq táýelsizdigin shegelep bekitemiz. Bolashaq urpaqqa energetıkalyq turǵydan táýelsiz, ıaǵnı ekonomıkasy turaqty jáne órkendegen Qazaqstandy mura etip qaldyramyz. Bul tarıhı sheshim Ádiletti Qazaqstandy qurý jylnamasyndaǵy jańa paraqshaǵa aınalady», – dedi ol.
Otyrys barysynda AES qurylysyna qoldaý bildirip, Halyqtyq shtabtyń quramynda kirgender qatarynda Ulttyq ǵylym akademııasynyń prezıdenti Aqylbek Kúrishbaev, «Qazaqstandyq atom elektr stantsııalary» JShS bas dırektory Tımýr Jantıkın, Qazaqstan Azamattyq alıansynyń prezıdenti Baný Nurǵazıeva, «Atameken» Ulttyq kásipkerler palatasy prezıdıýmynyń tóraǵasy Raıymbek Batalov, Qazaqstan halyq partııasynyń tóraǵasy Ermuhamet Ertisbaev, «Ardagerler uıymy» RQB tóraǵasy Baqtyqoja Іzmuhambetov, «Aýyl» partııasynyń tóraǵasy Serik Egizbaev, «Aq jol» Qazaqstan demokratııalyq partııasynyń tóraǵasy Azat Perýashev, Májilis depýtaty Ermurat Bápı, «Respublica» partııasynyń tóraǵasy Aıdarbek Qojanazarov, «Baıtaq» partııasynyń tóraǵasy Azamathan Ámirtaev, «Jastar Rýhy» jastar qanatynyń tóraǵasy Aqerke Iskanderova jáne basqalar boldy.
Sonymen qatar Halyqtyq shtabtyń quramyna Qazaqstan Respýblıkasy Kásipodaqtar federatsııasy, «Ardagerler uıymy» RQB, Ulttyq sport qaýymdastyǵy, «Assambleıa jastary» RQB, Qazaqstannyń ıAdrolyq qoǵamy, Taý-ken óndirý jáne taý-ken metallýrgııa kásiporyndary qaýymdastyǵy, Qazaqstan elektr energetıkalyq qaýymdastyǵy jáne basqa da uıymdar kirdi.
Shtab quramyna saıası partııalardyń ortalyq jáne aımaqtyq belsendileri, sondaı-aq respýblıkalyq qoǵamdyq birlestikterdiń ókilderi, sonyń ishinde Parlament pen máslıhat depýtattary, ıntellıgentsııa ókilderi, tanymal ǵalymdar, mádenıet jáne sport qaıratkerleri, «Jastar Rýhy» jáne basqa da jastar uıymdarynyń belsendileri kirdi. Aldaǵy ýaqytta shtab músheleri óńirlerdegi saılaýshylarmen jumysyn bastaıdy, eńbek ujymdarymen kezdesýler ótkizedi, shalǵaı eldi mekenderge barady.
Buǵan deıin Prezıdent AES qurylysy boıynsha referendým 6 qazanda ótetinin málimdegen bolatyn.
