AES qurylysy boıynsha zertteý jyl sońyna deıin júrgiziledi

NUR-SULTAN. QazAqparat – Qazaqstanda atom elektr stantsııasy qurylysynyń aspektilerin zertteý jumystary jyl sońyna deıin jalǵasady. Bul týraly QR Energetıka mınıstri Bolat Aqsholaqov málim etti, dep habarlaıdy QazAqparat tilshisi.

«Jaqynda bul taqyryp boıynsha aıtqan edim, ıaǵnı bul baǵyttaǵy jumystardy biraz pysyqtaý kerek. Sondyqtan osy jumystar kem degende jyl sońyna deıin jalǵasady», - dedi B. Aqsholaqov elordada munaı-gaz mashına jasaý salasyn damytýǵa arnalǵan forýmda tilshiler saýalyna jaýap bere otyryp.

Sonymen qatar tilshiler mınıstrden Túrkııadaǵy AES-tiń qurylysyn zertteýdiń mán-jaıy týraly surady.

«Bul stantsııa áli salynyp bitpegenin eskere otyryp, oǵan qatysty zertteý júrgizý qıyndaý bolar. Jalpy, biz bul jobanyń qanshalyqty aýqymdy ekenin qaradyq», - dedi vedomstvo basshysy.

«Joba «Rosatomnyń» qatysýymen júzege asyrylyp jatyr. Bul turǵyda osyndaı aýqymdy qurylys kezindegi lokalızatsııa máseleleri, aralas óndiristerdi jetildirý jergilikti qamtýdy damytýda eleýli múmkindikter jasaıdy», - dedi B. Aqsholaqov.

Budan buryn BAQ-ta Túrkııadaǵy «Akkýıý» AES-in «Rosatom» memlekettik korporatsııasy salyp jatqany habarlanǵan edi.