Muǵalim áıelin 11 jerinen pyshaqtap óltirgen atyraýlyq zeınetkerdiń soty bastaldy
ATYRAÝ. KAZINFORM – Atyraýda 13 jyl otasqan áıelin pyshaqtap óltirdi dep aıyptalǵan 63 jastaǵy er adamǵa qatysty aldyn ala sot tyńdaýy ótti.
Sot barysynda aıyptalýshy men marqumnyń kámelet jasyna tolmaǵan ortaq balasy bar ekeni belgili boldy. Sondaı-aq kúdiktiniń burynǵy nekesinen tórt balasy bar.
Memlekettik aıyptaýshy Mıras Baýyrjanovtyń aıtýynsha, erli-zaıypty arasynda 2024 jyldan bastap qyzǵanyshtan týyndaǵan senimsizdik qalyptasqan. Keıin bul jaǵdaı ýshyǵyp, qaıǵyly oqıǵaǵa ákelgen.
Tergeý nusqasyna sáıkes, 16 naýryzǵa qaraǵan túni kúdikti qonaq bólmede uıyqtap jatqan balasynyń kózinshe kúdikti áıelin 11 márte pyshaqpen jaraqattaǵan.
– Úsh márte keýde qýysy men ish aımaǵyna shanshyp-kesilgen jaraqat salynǵan. Sonymen qatar moıyn, ıyq, bilek jáne qol tustarynan jaraqat anyqtaldy. Saldarynan jábirlenýshi oqıǵa ornynda kóz jumdy, – dedi memlekettik aıyptaýshy.
Memlekettik aıyptaýshynyń sózinshe, kúdikti QR Qylmystyq kodeksiniń 99 babynyń 1 bóligi ( adam óltirý, ıaǵnı basqa adamdy quqyqqa qarsy qasaqana qazaǵa ushyratý) boıynsha qylmystyq is-áreket jasaǵan. Marqumnyń týystary sottan ádil sheshim kútetinin aıtty.
– Bul jaǵdaıdy estigende qatty kúızeldik. Buǵan deıin olardyń arasynda mundaı másele baryn bilmedik. Baýyrym 38 jyldyq eńbek ótili bar ustaz edi, – dedi marqumnyń ápkesi Múslıma Eleýsinova.
Aıyptalýshy sotta kinásin tolyq moıyndap, marqumnyń jaqyndarynan keshirim surady. Onyń aıtýynsha, oqıǵadan keıin polıtsııa men jedel járdem qyzmetin ózi shaqyrǵan.
Belgili bolǵandaı, zeınet jasyndaǵy er adam oqıǵaǵa deıin kúzetshi bolyp jumys istegen. Ol isti alqabılerdiń qaraýynan bas tartty.
Bas sot talqylaýy 5 maýsymǵa belgilendi.
Aıta keteıik, qaza bolǵan 58 jastaǵy áıel qala mektepteriniń birinde bastaýysh synyp muǵalimi bolyp eńbek etken. Uzaq jyl pedagogıka salasynda qyzmet atqaryp, bir kezderi mektep dırektorynyń orynbasary bolǵan.
