AES qana senimdi energııa bere alady – Qumar Áýsenov

ASTANA. QazAqparat – Atom elektr stansasy ǵana senimdi energııa bere alady. Mundaı pikirdi «Qazaqstan atom elektr stansasy» JShS atom energetıkasy bóliminiń jetekshi ınjeneri Qumar Áýsenov bildirdi, dep habarlaıdy QazAqparat tilshisi.

«Atom elektr stansasyn jobalaýmen aınalysyp jatqanymyzǵa 5 jyl boldy. Munyń bári elektr energııasynyń tapshylyǵyna baılanysty. Biz kóptegen jobany qarastyrdyq, ólshemsharttaryn ázirlep, baǵalaý júrgizdik. 2019 jyly 9 kompanııaǵa suranys jibergen edik. Olardyń ishinde amerıkalyq, reseılik, koreılik jáne qytaılyq 5 kompanııa jaýap berdi. Bul 4 eldiń tehnologııasy shamamen birdeı, uqsas», - dedi Qumar Áýsenov Eýrazııa ulttyq ýnıversıtetinde AES-tiń ekologııaǵa áserin talqylaýǵa arnalǵan dóńgelek ústel otyrysynda.

Onyń atap ótýinshe, atalǵan elderdiń barlyǵynyń tehnologııasy qaýipsiz. Jalpy, AES-tegi apat 10 mln jylda shamamen 1 ret qana oryn alýy múmmkin.

«Qazirdiń ózinde tapshylyq shyrqaý shegine jetkende 1 gıgavatqa deıin energııa tapshylyǵy bar. AES qana bazalyq senimdi energııa bere alady. Árıne, jylý stansasy da bar. Biraq, olar kómirtegin bóledi», - dedi ol.