AES boıynsha referendým: Múmkindigi shekteýli daýys berýshilerge bar jaǵdaı jasalady
ASTANA. KAZINFORM – Múgedektigi bar adamdardyń saılaý quqyqtaryn qamtamasyz etý – Ortalyq referendým komıssııasy qyzmetiniń basty ustanymy. Osy rette, Ortalyq saılaý komıssııasy ǵımaratynda ótken jıynda múmkindigi shekteýli jandarǵa qatysty daýys berý múmkindikteri aıtyldy.
Referendým daıyndaý naýqany sheńberinde múgedektigi bar adamdar úshin jaǵdaılardy qamtamasyz etý týraly qaýly qabyldanǵan.
«Qaýlyǵa sáıkes jergilikti atqarýshy organdarǵa referendým ýchaskelerinde múgedektigi bar adamdarǵa jaǵdaı jasaý jóninde qajetti sharalar qabyldaý tapsyryldy. Daýys berýge arnalǵan úı-jaılardy jaraqtandyrý jónindegi nusqaýlyqta úı-jaılardyń fızıkalyq qoljetimdiligin qamtamasyz etý, taktıldi kórsetkishterdi, daýys berýge arnalǵan kabınalardy, qulaq aspaptary bar kompıýterlerdi ornatý jáne taǵy da basqa mindetti sharalar jazylǵan», - dedi Ortalyq saılaý komıssııasynyń múshesi Anastasııa Shegortsova.
Ol qaýlynyń iske asyrylýy Ortalyq referendým komıssııasynyń baqylaýynda ekenin atap ótti. Sondaı-aq, ýchaskelerdiń daıyndyǵy boıynsha monıtorıng jumystaryna úkimettik emes uıymdardyń ókilderi tartylǵan.
Buǵan deıin múgedek adamdardyń saılaý quqyqtaryn qamtamasyz etý boıynsha Ortsaılaýkom janyndaǵy jumys tobynyń keńeıtilgen otyrysy ótkizilgen. Onda zaǵıp azamattar úshin bul referendýmnyń barlyq ýchaskelerin Braıl shrıfti bar arnaıy trafarettermen, sondaı-aq bıýlletenderdiń aýdıo nusqasymen qamtamasyz etý qajettiligi, qajet bolǵan jaǵdaıda estý qabileti buzylǵan azamattardy ymdaý tili mamanymen baılanystyrý úshin ınternetke qol jetkizý qajettiligi, kreslo-arbalardy paıdalanatyn múgedektigi bar adamdar úshin – manevrlik qozǵalysqa arnalǵan arnaıy keń kabınalardyń bolýy, barlyq aqparattyq stendterdi kreslo-arbalardy paıdalanatyn azamattar úshin qoljetimdi bıiktikte úlken qarippen ornalastyrý sııaqty usynystar aıtylǵan.
Aıtpaqshy, Braıl shrıftin meńgergen zaǵıptar úshin 2359 ǵana trafaret shyǵarylmaq. Barlyq ýchaskelerde suranys bolmaıtyndyqtan OSK basshylyǵy únemdeýge kóshken. Sebebi, bul sharýaǵa bıýdjet qarjysy jumsalady eken.
Belgili bolǵandaı, daýys berýge arnalǵan bir trafarettiń jobalyq quny 20,5 teńgeni, al Braıl shrıftimen 1270 teńgeni quraıdy. Buryn mundaı bıýlletenderdi óndirýge 13,1 mıllıon teńge jumsalǵan, al aldaǵy daýys berýde bul shyǵystar 2,9 mıllıon teńgege deıin qysqartylmaq.
