Aerotaksıdiń jol aqysy qansha bolady
ASTANA. KAZINFORM — Baǵany belgileýde álemdik tájirıbe eskeriledi. Bul jóninde «Alatau City Authority» memlekettik qorynyń Bas atqarýshy dırektory Álisher Ábdiqadyrov málimdedi.
Memleket basshysynyń Alatau City jobasyna qatysty tapsyrmalaryn iske asyrý jónindegi baspasóz konferentsııasynda ol bul sektordyń shetelderdegi mysaldaryna toqtaldy.
— Álemdik tájirıbe boıynsha, qazir aerotaksılerge 5-9 adam otyrady. Sonymen qatar, 1 shaqyrym qashyqtyqqa orta eseppen 1 dollar tólenedi. Bizde de shamamen solaı bolady. Búginde taksılerdiń de ekonom, komfort, komfort plıýs tárizdi deńgeıleri bar. Al aerotaksıdiń jol aqysy taksıdiń eń joǵary klasyndaǵy baǵamen sáıkes keledi. Óıtkeni, onyń artyqshylyqtary bar ekeni túsinikti. Baratyn jerge kepteliste turmaı, tez jetkizedi, — dedi ol.
Sonymen birge, qor basshysy aerotaksı turǵyndardyń arasynda úlken suranysqa ıe bolady dep oılaıtynyn jetkizdi. Onyń pikirinshe, bul qyzmetti, ásirese, áýejaıǵa baratyndar jıi qoldanýy múmkin.
— Týrıster tarapynan da zor suranys bolatynyna senimdimin. Óıtkeni, aerotaksı marshrýtynda taý klasteri men Qapshaǵaı da qamtylady. Kólik toraptaryna aerotaksı qonatyn aranıy porttar salynady. Sonda deıin azamattar aerotaksımen jetip, ary qaraı ne jaıaý ne kólikpen barýǵa múmkindigi bolady, — dedi Álisher Ábdiqadyrov.
Aıta keteıik buǵan deıin Alataýda aerotaksı qashan qoldanysqa beriletinin jazǵanbyz.
