Advokattar men notarıýstar zeınetaqy jarnalaryn aýdaryp otyrýǵa mindetteldi

ASTANA. QazAqparat - Memleket basshysy qol qoıǵan "Qazaqstan Respýblıkasynyń keıbir áleýmettik qamsyzdandyrý máseleleri boıynsha zańnamalyq aktilerine ózgerister men tolyqtyrýlar engizý týraly" QR Zańy azamattyq-quqyqtyq sıpatta kelisimshart boıynsha jumys isteıtinderge jańa mindettemeler júkteıdi, dep habarlaıdy QazAqparat tilshisi.

Prezıdent qol qoıǵan Zańnyń 25-bóligi 8-tarmaǵyna sáıkes, "Zeınetaqymen qamtamasyz etý týraly" Zańnyń 25-baby 4-tarmaǵyna ózgerister engizilgen.

"Azamattyq-quqyqtyq sıpatta kelisimshart boıynsha tabys tabatyn advokattar, jeke sot oryndaýshylar, jeke notarıýstar, kásibı medıatorlar, jeke kásipkerler, sonymen qatar jeke tulǵalar úshin ár aı saıyn BJZQ-ǵa óz paıdasyna aýdarýǵa jatatyn mindetti zeınetaqy jarnasy tapqan tabystyń 10 paıyzyna teń. Biraq ol soma aılyq eńbekaqy mólsheriniń 10 paıyzynan tómen nemese 75 eselengen aılyq eńbekaqy mólsheriniń 10 paıyzynan artyq bolmaýy kerek", - delingen zańda.

BJZQ-da bul ózgeristerdiń jaǵymdy tustary bary atalyp ótti.

"Budan buryn Zańda atalyp otyrǵan tulǵalar zeınetaqy jarnasyn aýdaryp otyrýǵa quqyly bolatyn, al endi jarnany mindetti túrde aýdarýy kerek. Kelisimshart boıynsha jumys jasaıtyn kóptegen adamdar buǵan deıin zeınetaqy jarnasyn óz talap-tilegi boıynsha aýdaratyn. Bul jaǵdaı qartaıǵan kezde aqshasyz qalý qaýpin údete tústi", - dep habarlaıdy BJZQ baspasóz qyzmetinen.

Jańa Zańnyń qoldanysqa enýimen jańadan ashylatyn zeınetaqy esepshottary boıynsha alǵashqy statıstıka keıinirek belgili bolady. Zań 14 shildede kúshine enedi.