Ádilet organdaryna sot oryndaýshylarynyń qaýlysyn joıý quqyǵy berilýi múmkin
ASTANA. KAZINFORM — Májilis depýtattary keıbir zańnamalyq aktilerge sot júıesin reformalaý jáne protsestik zańnamany jetildirý máseleleri boıynsha ózgerister men tolyqtyrýlar engizýdi kózdeıtin zań jobasyn birinshi oqylymda qarap jatyr.
Qujatty tanystyrǵan Májilistegi zańnama jáne sot-quqyqtyq reforma komıtetiniń múshesi Únzıla Shapaq ákimshilik ister boıynsha shyǵarylǵan sot sheshiminiń oryndalýy nege birneshe jylǵa sozylyp jatqanyn aıtty.
«Ákimshilik rásimdik-protsestik kodeksti qabyldanǵannan keıin sot oryndaýshysynyń áreketterine shaǵymdanýǵa baılanysty ister ákimshilik sot isin júrgizý tártibimen qaralady. Atqarýshylyq is júrgizý týraly zań sot oryndaýshysynyń árbir áreketine shaǵymdaný quqyǵyn beredi. Búginde mundaı quqyqty boryshkerler asyra paıdalanady. Boryshker sot oryndaýshysynyń baǵalaýshyny taǵaıyndaý jáne tartý jónindegi áreketterine daý aıtady. Sodan keıin baǵalaý týraly eseptiń ózine, múlikti saýda-sattyqqa berý jónindegi is-áreketterge, saýda-sattyqtyń ózine, saýda-sattyq hattamasyna, bir atqarýshylyq is júrgizý boıynsha sot oryndaýshysynyń is-áreketterine ondaǵan ret shaǵym jasalýy múmkin. Saldarynan sot sheshimin oryndaý birneshe jylǵa keshikgedi», — dedi depýtat.
Únzıla Shapaq ádilet organdaryna sot oryndaýshylar shyǵarǵan qaýlylardy joıýǵa quqyq berýdi usyndy.
«Joǵarǵy sottyń málimetteri boıynsha sot oryndaýshylary isterdiń 55%-dan astamynda ózderiniń zańsyz áreketteri bolǵanyn rastaýymen aıaqtalady. Sondyqtan mundaı daýlar boıynsha ádilet organdarynyń rólin kúsheıtip, olarǵa sot oryndaýshylarynyń qaýlylarynyń kúshin joıý quqyǵyn berý oryndy dep sanaımyz. Bul atqarýshylyq is júrgizýdi jedel oryndaýǵa múmkindik beredi», — dedi Májilis depýtaty.
