Ádiletti áleýmettik saıasat: Aqtóbede 20 mektep salynýda

AQTÓBE. QazAqparat - Aqtóbede sońǵy úsh jylda bilim berý salasyna bólingen qarjy kólemi 21 mıllıard teńgege artty. Bıyl salynyp jatqan 20 bilim ordasynyń ǵımaraty 11 úsh aýysymdy, 2 apatty jáne 7 eski mektep máselesin sheshýge múmkindik beredi, dep habarlaıdy QazAqparat tilshisi.

Memleket basshysy Qasym - Jomart Toqaev «Ádiletti áleýmettik saıasat» baǵytynda bilim men densaýlyq saqtaý salasyna basa nazar aýdarǵan. Máselen, Aqtóbe oblysynda 3-6 jas aralyǵyndaǵy balalardy balabaqshamen qamtý 98,8 paıyzǵa jetti. Al 20 mektep qurylysy 11 úsh aýysymdy, 2 apatty jáne 7 eski mektep máselesin sheshýge múmkindik beredi.

«2019-2020 oqý jylynda 3000 oryndyq 13 mektepti qoldanysqa berý josparlanyp otyr. Jalpy bilim beretin mektepter túgel keń jolaqty, onyń ishinde 93,3%- jyldamdyǵy 4 mbıt jáne odan joǵary ınternet júıesine qosylǵan. Barlyǵy 71 balabaqshada jáne 241 jalpy bilim beretin mektepterde ınklıýzıvtik bilim berýge jaǵdaı jasalǵan», - dep habarlady oblystyq bilim basqarmasy.

Prezıdenttiń «Ádiletti áleýmettik saıasat» baǵytynda densaýlyq saqtaý salasyn damytýǵa tapsyrma berilgen. Bıyl bes aıda «Densaýlyq» memlekettik baǵdarlamasynyń 42 ındıkatorynyń 39 oryndaldy.

«Oblystyń jalpy demografııalyq ahýaly turaqty. Halyq sany búgingi kúni 870 359 turǵyndy qurap otyr. Ótken jylmen salystyrǵanda halyq sany 1,4% ósti. Jalpy 5 aıda oblys turǵyndaryna 1 990 052 memlekettik qyzmet kórsetildi. Onyń 74 % elektrondy túrde ótti», - dedi oblystyq densaýlyq saqtaý basqarmasynyń basshysy Áset Qalıev.

Aıta keteıik, aýyl turǵyndarynyń medıtsınalyq kómekke qoljetimdiligin arttyrý maqsatynda bıyl 19 nysandy iske qosylýy josparlandy. Onyń ony dárigerlik ambýlatorııa, beseýi medpýnkt, tórteýi akýsherlik - feldsherlik pýnkt. 2018 jyldan bastap oblystyń barlyq shalǵaı aýdandaryna tájirıbeli onkolog, kardıolog mamandary jiberilip jatyr. Bıyl bes aıda onko, kardıodesant dárigerlerine 1700 aýyl turǵyny qaralyp, 321 adamnan dert anyqtaldy.

«Jyl saıyn barlyq shalǵaı aýyldarǵa jyljymaly medıtsınalyq keshen jiberiledi. Quramynda gınekolog, onkolog, hırýrg, oftalmolog, travmatolog, terapevt, pedıatr mamandar jáne ÝDZ, laboratorlyq zertteýler bar. «Stomkar» jyljymaly stomatologııalyq qurylǵysy aýyl turǵyndarynyń tisin emdeýge múmkindik beredi. Qazir oblysta birqatar áleýmettik mańyzy zor nysannyń qurylysy jalǵasýda. «Check-up» ortalyǵy Seýl ulttyq ýnıversıtetimen birlese otyryp salynady. Quny - 6,7 mlrd teńge. «General Electric» amerıkandyq kompanııasymen birlesip quny 7,5 mlrd teńge bolatyn pozıtrondy-emıssıondyq tomografııa ortalyǵy ashylady. Germanııa jáne Slovakııa mamandarymen birge balalarǵa arnalǵan onkogematologııalyq ortalyǵy, oblystyq perınataldik ortalyǵy boı kóteredi», - dedi Áset Qalıev.

Aqtóbe agromıratsııansy oraı jańa aýdandar boı kóterip jatyr. Densaýlyq saqtaý mınıstrliginiń tapsyrmasymen Aqtóbe qalasy turǵyndaryna medıtsınalyq kómektiń «bir qadamdyq qoljetimdilik» qaǵıdasyn júzege asyrý kózdelip otyr. Ol úshin kóp qabatty úılerdiń birinshi qabatynan shaǵyn emhanalar ashý josparlandy. Qazir densaýlyq saqtaý basqarmasy qala ákimine óz usynysyn berdi.