Ádilbek Qaba: Balalar tilinde sóıleı alatyn shyǵarmalarǵa zárýmiz

NUR-SULTAN. QazAqparat - Mádenıet jáne sport mınıstrligi Til saıasaty komıteti «Ult ádebıeti – jastar kózimen» atty jas aqyn-jazýshylarmen onlaın kezdesý ótkizdi, dep habarlaıdy QazAqparat tilshisi.

Jas urpaqty ulttyq dástúrde tárbıeleýdegi ádebıet pen jas talantty aqyn-jazýshylar róli qandaı? Besiktegi búldirshin men mekteptegi oqýshy ulttyq tárbıege qanyǵyp ósip kele me? Mine, onlaın kezdesýde osy mańyzy joǵary ulttyq rýhanııattaǵy til, oı qundylyǵy, jastar tárbıesindegi ádebıet máseleri talqylandy.

Pikirtalasqa elimizge tanymal jas aqyn-jazýshylar, «Ana tili» gazetiniń bas redaktory, aqyn Janarbek Áshimjan, Memlekettik «Daryn» syılyǵynyń ıegeri Erlan Júnis, «Balapan» telearnasynyń dırektory Maqpal Jumabaı, aqyn, aýdarmashy Maqpal Mysa, jazýshy ári dramatýrg, synshy Álibek Baıbol, jas dramatýrg, prozashy Jaqsylyq Muratbek qatysyp, utymdy oılaryn ortaǵa saldy.

«Eldiń erteńgi zııalylary, el aqıqatyn aıta alatyn jas ádebıetshileri retinde sizdermen aqyldasaý mańyzdy. Jas qalamgerler men Úkimet arasynda baılanys ornatý - sanaǵa qanat bitiretin, balalar oıynyń damýyna úles qosatyn shyǵarmalar jazýǵa talpyndyrý dep oılaımyn. Balalar tilinde sóıleı alatyn, olardyń sanasyna ulttyq dástúrdi qalyptastyra alatyn shyǵarmalarǵa zárýmiz. Balanyń tiliniń ózge tilde shyǵýyna myna ózgermeli zamandaǵy jańa tehnologııanyń da kesiri bar. Sol tehnologııalyq qurylǵylardaǵy tárbıelik dúnıeniń bári ózge tilde. Anımatsııalyq dúnıeler joqtyń qasy. Bolǵan jaǵdaıda máni men maǵanasy qazaqı sanaǵa jetimsiz», - deıdi Til saıasaty komıtetiniń tóraǵasy Ádilbek Qaba.

Kezdesýde ásirese, kitap shyǵarý men taratý, klassıfıkatsııalaý, balalarǵa arnalǵan shyǵarmalarǵa qoıylatyn talaptardy álemdik dárejede saralaý qajettiginiń mańyzdylyǵy qozǵaldy. Sondaı-aq, kitap taratý, syn janyry, dramatýrgııa, balalar ádebıetin damytý týraly naqty usynystar aıtyldy.

Shara qortyndysy boıynsha jas jazýshylar usynǵan qundy usynystarǵa oraı arnaıy sheshim qabyldanatyn boldy.

Foto:ernur.kz