Adamzat VS COVID-19: Álem elderindegi ahýal qandaı
DSU ınfektsııanyń taralýy órship jatqanyn jarııalady. Ótken demalys kúnderi álemde 400 myń adam aýrý juqtyrǵan. Alaıda álemde aýrýǵa shaldyǵý deńgeıi ósip bara jatqanyna qaramastan, DSU basshysy Tedros Gebreıesýs ázirge álemniń pandemııa shyńyna jetpegenin jarııa etti.
Aýrýdyń negizgi oshaǵy myna memleketter:
- Úndistan. Kún saıyn indetke shaldyqqandar sany 20 myńnan asyp otyr. Tek sońǵy táýlikte 24 248 adam aýyrǵan. Bul el aýrýdan qaıtys bolǵandardyń jalpy sany boıynsha álemde 8-shi orynda;
- Brazılııa. Osy aptada eldiń densaýlyq saqtaý mınıstrligi bir táýlik ishinde koronavırýs juqtyrǵandar sany 38 myńǵa jýyqtaǵanyn habarlady. Qaıtys bolǵandar sany myńnan asady. El Prezıdenti Jaır Bolsonarý da koronavırýsqa shaldyqqanyn rastady;
- Izraıl. Koronavırýs jaǵdaıynyń nasharlaýyna baılanysty bılik shekteýlerdi qaıta ornatty. Premer-mınıstr Bınıamın Netanıahý málimdegendeı, eger aptanyń basynda elde COVID-19 juqtyrǵandar sany shamamen bir jarym myń adam bolsa, sońǵy kúnderi bul kórsetkish eki ese ósken. Barlar, klýbtar, sport zaldary jabyldy, buqaralyq is-sharalar ótkizýge tyıym salyndy;
- Ońtústik Koreıa. Maýsym aıynyń sońynda Ońtústik Koreıa bıligi koronavırýs ınfektsııasyn juqtyrýdyń ekinshi tolqyny bastalǵanyn málimdedi. Tedjon qalasynda áleýmettik qashyqtyqtyń qatań sharalary engizilip, sport zaldar, mýzeıler men kitaphanalar jabyldy;
- Reseı. KVI jaǵdaıy qazirgi Reseı prezıdenti Vladımır Pýtınniń reıtıngine yqpal etti. «Levada-ortalyqtyń» málimeti boıynsha, sáýir aıynda onyń reıtıngi 59%-dy, mamyr aıynda - 25%-dy qurady. Bul el basqarǵan 20 jyl ishindegi rekordtyq eń tómengi kórsetkish. Sarapshylardyń aıtýynsha, koronavırýs jaǵdaıy mańyzdy ról atqarǵan. Halyq resmı statıstıkaǵa, emdeý hattamalaryna senbeıdi;
- Eýropa. Jaǵdaıdyń qalpyna kelip jatqanyna qaramastan, jekelegen elderde aýrýdyń órshýi baıqalady. Mysaly, Ispanııa men Serbııada. Serbııa bıligi Belgradta 10-13 shilde aralyǵynda komendanttyq saǵat rejımin engizetinin jarııalady. Qalada COVID-19 aýrýynyń 299 jańa jaǵdaıy anyqtaldy, 13 adam qaıtys boldy. Tótenshe jaǵdaı Serbııanyń 19 qalasy men aýdandarynda da jarııalandy;
Bul rette jańa shekteýler engizý jospary týraly málimdeme Belgrad ortalyǵyndaǵy jappaı narazylyqtar men tártipsizdikterge sebep boldy. Narazylyqqa shyǵýshylar polıtsııa kordondaryna shabýyldap, avtomobılder men qoqys jáshikterin órtedi. Parlament ǵımaratynyń aldynda bes myńǵa jýyq adam jınaldy, olardyń oppozıtsııalyq belsendiler basqarǵan bir bóligi ǵımaratqa basa-kóktep kirdi;
Sonymen qatar, EO-da ekonomıkalyq belsendilik tómendep jatyr. Sarapshylar Eýropa ekonomıkasynyń osy jyly 8,3%-ǵa quldyraǵanyn jáne kelesi jyly 5,8%-y qalpyna keletinin boljap otyr (sáýirdegi boljamda -7,4% jáne +6,1% boldy);
- AQSh. AQSh-tyń bas epıdemıology Entonı Faýchı AQSh koronavırýstyń alǵashqy tolqynynda «tize búgip» qaldy dep sanaıdy. AQSh-ta koronavırýstan kóz jumǵandar sany dúısenbi kúni 130 myń adamnan asty, indetke shaldyqqandar 3 mln-ǵa jýyqtady. Shekteýler ishinara alynyp tastalǵannan keıin keıbir shtattardaǵy aýrýhanalar lyq toldy;
- Aýstralııa. Melbýrn qalasynda koronavırýsqa baılanysty alty aptalyq lokdaýn engiziledi jáne adam kóp qonystanǵan Vıktorııa men Jańa Ońtústik Ýels arasyndaǵy shekara belgisiz merzimge jabylady.
Osynaý kúrdeli kezeńde Qazaqstanda indetpen ymyrasyz kúres júrgizip jatyr. Kúni keshe Memleket basshysy Qasym-Jomart Toqaev respýblıkalyq telearnalar arqyly elimizde qalyptasqan ahýalǵa baılanysty úndeý jarııalaǵan bolatyn.
Prezıdent otandastarymyzdy halqymyzdyń basyna túsken synaq aldynda qaısarlyqqa, sabyr men jaýapkershilikke shaqyrdy.
Sondaı-aq osy ýaqytqa deıingi jumystyń kemshilikteriniń sebebin atady.
Qasym-Jomart Toqaevtyń aıtýynsha, halyqty dári-dármekpen qamtamasyz etý problemasy taıaý arada sheshimin tabady.
Sondaı-aq qolǵa alynatyn sharalardyń arqasynda Qazaqstanda aldaǵy ýaqytta halyqtyń PTR-testiden ótý jıiligi táýligine 40 myńǵa jetkizilmek.
